Kamingaw sa payag

Tungang gabii na sa dihang nahuman ako og type sa akong tinuod nga kaagi sukad mamatay ang akong asawa. Mitindog ako ug nanghuyatid sa dihang mitingog ang akong selpon. Ako kining gitan-aw ug gibasa. “Pa, ibaligya na lang nang imong gamay nga payag ug mokuyog ka na lang namo sa Amerika aron malingaw ka, kay sa magsige ka og handom ni mama diha, maguol ka lang,” mao kini ang akong nabasa gikan sa usa nako ka anak nga tua sa Manila. Ako kining gitubag.

“Dili ko kabiyaan ang akong payag sanglit daghang mga handumanan nga gibilin si mama mo nga lisod kong hikalimtan.”

“Mao man gani nga pakuyogon ka namo aron imong hikalimtan ug dili kana maguol. Tingali og makahunahuna ka og minyo didto.”

Ingon usab niana ang gisulti sa usa nako ka higala.

“Gal, ikaw na man lang usa diha, nganong di ka man mangita og kauban o kaha magminyo ka pag-usab, wa kay bay nagustohan?”

“Kun sa nagustohan, duna,” akong tubag. “Duha lang ka babaye ang akong nagustohan apan wa gyud koy swerte.”

“Ngano man, wa ka sugta?”

“Gisugot na man ta ko sa usa ug uyab ko na siya apan buhi pa man ang iyang bana bisan napulo na ka tuig silang nagbulag.”

“Kinsa man na, Gal?”

“Siya si Eden ang akong gihimong Super Eden sa akong nobela. Wala siya’y anak apan may adapted siyang usa, babaye.”

“Kinsa man sab nang usa?”

“Halos magkapareho ang ilang panagway, batan-on lang kini kay 36 pa man siya samtang si Eden, 51 na. Dili ko ikabutyag ang iyang ngalan sanglit duna pa siya’y bana ug tulo ka mga anak. Busa naka-ingon ako nga wa gyud koy swerte kay hikit-an ko na unta ang babaye nga akong ibutang sa luna nga gibiyaan sa akong asawa apan pareho man silang may mga bana.”

“Mangita ka na lang og lain, Gal.”

“Ako na kanang gisulayan, apan nakagasto lang ako og dako kay andam nga mokuyog nako ang babaye, apan di ko naman siya kursonada.”

“Unya, magmingaw na lang permi ang imong payag?”

“Mas palabihon nako nga magmingaw ang payag kay sa magubot ang akong kinabuhi. Andam kong hulaton ang panahon kun itugot pa sa Ginoo nga hatagan pa ako og higayon nga makaminyo sa pag-usab.”

“Sige, Gal, hinaut nga makaplagan nimo ang babaye nga angay kanimo.”

“Salamat.” (Katapusan)