Gula 7
Sa kasagmuyo ni Glenn, miinom siya’g daghang bino. Wala danti og dugay, nabatyagan ni Glenn nga nalipong siya. Nasigpatan nila ni Glenn nga may nagsingabot nga kotse.
Nakamay-ong si Glenn nga kang Mr. Chiong ang maong sakyanan. Wala siya masayop kay mihunong kini atubangan sa balay nila ni Tessa ug nanaug ang dalaga. Nanaug usab si Mr. Chiong sa kotse.
Misamot nga nasakitan pag-ayo si Glenn. Gikuot niya ang selpon sa iyang bulsa ug giteksan si Tessa. Sa lima ka sumpay-sumpay nga text ni Glenn, gipadayag niya ang iyang kasagmuyo ug sa kataposan gipasabot niya nga naingon siya niini tungod sa gugma.
Mitungab pa gayud si Glenn og laing shot sa imported wine. Mitingog ang iyang selpon. “Glenn, naa diay ka’s ilang attorney? Ari diri kay dia si Mr. Chiong kay birthday ni Mama, wa tawon mi relasyon uy.” Nahukman ni Glenn nga tumanan si Tessa. Gusto niya nga tug-anan si Mr. Chiong sa iyang gibati kang Tessa ug pasabton nga andam siya nga magpalayo. “Dali Glenn, lingkod tupad namo. Karon nakatoo na ko nga tinarong ang imo kang Tessa,” matud ni Mr. Chiong.
“Salamat sir. Pero karon pa gayud nako gitug-anan si Tessa nga may pagbati ko niya. Apan nasabtan nako nga may relasyon man diay mong duha, andam ko nga mosakripisyo sa akong pagbati,” ni Glenn pa. Nakabantay si Glenn nga mipahiyom si Tessa ug Mr. Chiong, samtang miiknat ang kilay sa inahan sa dalaga. “Tessa, buotan nga pagkatawo kini si Glenn, unsa may pagbati ka ba kaniya?” nangutana si Mr. Chiong.
“Sa text ra man na siya manguyab nako uncle,” tubag ni Tessa nga nakapakurat ni Glenn. Daw nahuwasan siya sa iyang pagkalipong. “Ang tinuod Glenn, pag-umangkon nako kini si Tessa nga gihimo nako nga secretary sa opisina, sayop ka sa imong pagtoo nga duna kami relasyon,” ni Mr. Chiong.
Wala makatingog si Glenn nga daw natuk-an sa iyang nadungog. “Nagtoo man gud ko nga gusto ra nimo nga binuangan ang akong pag-umangkon mao nga wala na ko ganahi nga motagad nimo, apan karon dili na ko masuko kun tinarong ang imo kang Tessa,” pasabut ni Mr. Chiong. Nagdungan sila’g pangaon si Glenn ug Tessa. Masabut kaayo sa tinan-awan ni Tessa nga dili niya pakyason si Glenn sa gihalad niini nga gugma. “Giubanan nako si tiyo pagpalit og gift para ni Mama,” pasabut ni Tessa.
“Abi ba kadto nako og may relasyon kamo ni Mr. Chiong. I love you Tess,” gilitok na g’yud ni Glenn atubangan sa dalaga ang iyang gibati. Wala motubag si Tessa, apan tam-is ang iyang pahiyom ngadto ni Glenn. (Kataposan)