Gula 5
Walay nahimo sila si Glenn ug Tessa gawas sa pagduol kang Mr. Chiong, ang general manager sa kompaniya nga gitrabahoan ni Tessa.
Mi-amen si Tessa kang Mr. Chiong. Mitutok ang Insik ngadto kang Glenn nga dali kaayo nga nakadungo sa iyang ulo kay gibati siya’g kauwaw.
Mibalik sila si Tessa ug Glenn sa ilang lamesa. Nabantayan ni Glenn nga adunay mga higayon nga mopasiplat kanila si Mr. Chiong.
Una nga milakaw kanila si Mr. Chiong. Wala na kini mananghid pa kanila kay aduna kini kauban nga mga Insik nga gitoohan ni Glenn nga mga negosyante usab.
“Dili kaha masuko si Mr. Chiong nga nakigkuyog ko nimo Tess?” daw may kahingawa sa tingog ni Glenn. “Nganong masuko man nga wala man kita’y gihimo nga dautan,” dali nga tubag ni Tessa.
Si Glenn g’yud tinuod ang mibayad sa ilang gikaon. Alang kaniya gamay ra kaayo ang kapin sa usa ka libo ka pesos nga iyang nagasto kay kini maoy nakapasuod pag-ayo kanila ni Tessa.
Human sa ilang dinner, nakahukom sila nga mopauli. “Asa dapit ang imong gipuy-an Glenn kay i-drop na lang tika,” nangutana si Tessa. “Ayaw na lang ko og ihatud Tess, mag-taksi na lang ko kay maikog kaayo ko nimo.”
Gitug-anan hinoon ni Glenn si Tessa nga anaa siya magpuyo sa Mabolo. “Aw sigi, iagi na lang tika Glenn kay ang among balay anaa man sa Barangay Kasambagan, dili kaayo layo,” matud ni Tessa. “Duna ko’y amigo diha sa Barangay Kasambagan, Tess, si Atty. Jose Marie Poblete nga maoy city administrator,” giingnan ni Glenn si Tessa. “Aw kaila diay mo si sir Poblete? Unahan ang amo sa ilang balay,” ni Tessa pa.
“Kun mao, sayon ra diay ini tultolon kay pirmi man ko moanha sa ilang attorni Poblete kay usahay mag-videoke man mi,” matud ni Glenn nga nagngisi. “Diha lang ko sa luyo simbahan sa Mabolo ihunong Tess.”
Misiga ang mga mata sa barkada ni Glenn nga nakakita nga gihatud siya’g babaye nga de-kotse. “Kagwapa gud adtong naghatud nimo Glenn. Pakiskisa ko’g imong ko-ko bi,” matud sa usa niya ka barkada nga nagkatawa.
Nagkasuod pag-ayo sila si Glenn ug Tessa. Kanunay na gani kini nga bisitahan ni Glenn sa iyang opisina. Apan diha’y higayon nga migawas sa opisina si Mr. Chiong. Wala kini motagad ni Glenn. Nahibulong kaayo ang ulitawo nganong mora’g nasuko si Mr. Chiong kaniya. (Sumpayan)