Dumuduong

Gula 4

Apan nasamad ang iyang pagsalig. Nahitabo ang dakong tuis ug baligho. Gipakugangan sila sa tem ni Santino. Miladlad og talagsaong taktika sa opensa ug depensa sa dula ang Parokya Paglaom kagahapon. Nagmangtas ang team ni Santino. Nagbahis ang tanang mga magdudula sa maong koponan. Wala nila kapangandami ang nagkayo nga salida sa tem ni Santino mao nga napilde gayod sila, butang nga ingon sa dili makatuo si Maambong nga mahitabo. Nagdumili ang iyang kabubut-on pagdawat sa kamatuoran. Alang niya, nasugba siya sa kauwawan. Napaso ang iyang dughan.

Diriyot gani magkagubot ang dula. Init kaayo’g ulo si Maambong. Mora’g may demonyo nga mihulhog sa iyang hunahuna. Tungod sa iyang kasuko sa ilang pagkapilde, milugnot ang iyang kapungot. Gihagit niya si Santino nga magtaksanay sila sa kusog. Maayo gani kay gipugngan siya sa mga polis ug barangay tanod. Apan miluwat siya og bahad nga may adlaw ra gayod si Santino alang kaniya.

Si Maambong maoy team captain sa Tribu Burukinto. Tungod sa iyang kalagot sa nahiagoman nilang kapildehan sa mga kamot sa Parokya Paglaom, nakahukom siya nga ihurot nila’g inom ang ilang premyo. Mao nga nangahubog gayod sila. -- Sumpayan pa