Ikaw ang gigabaan! Dili ako!” banghag ni Yvonne ngadtos iyang inahan nga si Ursula nga naglingkod sa iyang wheelchair sa terasa sa ilang mansion. 80 na si Ursula. Bag-o lang nabiyuda. Ug nagkangokango na sa kaluya ug kamasakiton.
Kada adlaw siyang gidayalisis tungod sa iyang dayabitis. Karong hapona, bag-o lang siyang nahuman og dayalisis. Unya, gipatawag niya si Yvonne kay duna siya’y mahinungdanong isulti.
Mayor sa ilang lungsod sa Duryona si Yvonne. Unya nakadungog si Ursula og taho nga nag-abuso sa iyang gahum iyang anak. Buwag sa bana si Yvonne. Ang huhungihong nga wa kaagwanta ang bana sa kinaiya sa mayor. Kay way gikalingawan si Yvonne, gigastohan sa ginikanan sa politika. Gihimo nilang mayor. Ikatulong termino na karon niya.
Gamhanan ug kuwartahan ang ginikanan ni Yvonne. Si Gardo iyang amahan, sa buhi pa, gobernador sa ilang probinsiya. Si Ursula, sa maayo pag panglawas, huwes sa Regional Trial Court. Gawas sa iyang pagkahuwes, dunay negosyo nga lending. Sukad nagrabe ang sakit ni Ursula, gipiyal niya ang negosyo ngadto ni Yvonne.
Sa bag-o pang namayor si Yvonne nagpagiya siya sa iyang mga ginikanan. Dihang nasuheto na siya sa mga pasikotsikot sa trabaho, dili na maminaw sa tambag sa ginikanan. Tua na siya naminaw sa dagkong negosyante nga mga supporters niya. Gigamit niya ang kuwarta sa lungsod aron sa paglulinghayaw. Ang katuyoan sa suroysuroy pagpangita og mga negosyong kusog. Unya pangitaa’g paagi nga mailog sa iyang mga supporters ang mga negosyo.
Dunay kusog nga negosyo sa usa ka baryo sa iyang lungsod. Gipanag-iya ug gidumala sa usa ka magtiayong way anak. Tiguwang ug masakiton na ang bana. Kaduha sa usa ka semana iyang pagdayalisis tungod sa dayabitis. Nagkailhanay si Sendo ug Ursula kay nagkatupad og higdaanan sa ospital diin sila gidayalisis. Nagkahibaw-anay nga si Mayor Yvonne anak diay ni Ursula. Nakasumbong si Sendo sa iyang problema. Pasirhan iyang negosyo. Nagpakitabang siya sa inahan aron makahangyo sa anak.
“Gimandoan man kos mayor nga pasirhan akong negosyo nga mountain resort. Mao ra may akong kabuhian. P30,000 akong gasto sa dayalisis kada bulan. Kun wa na koy negosyo, seguradong mamatay na ko,” ni Sendo ngadtong Ursula dihang nagkadungan sila’g dayalisis.
“Dili diay ka mahadlok gabaan? Nga pasirhan nimo ang negosyo sa tiguwang aron ipuli nimo imong mga barkadang negosyante?” ni Ursula.
“Kanang gidayalisis ka matag adlaw, mao nay gaba nimo. Ikaw ang gigabaan. Dili ako!” ni Yvonne.
Giliso ni Ursula ang wheelchair aron motalikod sa anak. Nipadagan siya’g hinay padulong sa iyang lawak. Di na mabangbang ang iyang anak. Iyang gitabangan aron maluklok sa poder. Karon, nahubog na sa gahum. Dako niyang pagabasol sa pagtabang sa iyang anak nga makaangkon og gahum. Ulahi kanunay ang pagbasol. (Kataposan)