Trabaho ug gugma

Gula 4

"Bangkahan g'yud ko nimo'g dinner Glenn?' matud ni Tessa dihang nakasakay na sila pagbalik sa kotse sa dalaga. "O lagi, wala ko magkomedya Tess. Gihuwat man gani tika. Apan duna lang ko'y gikabalak-an," dali nga tubag ni Glenn.

Napalingi si Tessa kang Glenn ug daw nakurat.. "Unsay imong gikahadlokan ba?" nakapangutana si Tessa sa ulitawo.

Gitug-anan ni Glenn ang dalaga nga ang iyang gikabalak-an kun makit-an sila nga magkuyog sa boyfriend ni Tessa. "Aw, mao ra diay na ang imong gikahadlokan? Wala na man ko'y boyfriend Glenn."

Daw dili makatoo si Glenn sa iyang nadunggan. Sa panagway ni Tessa dili gayud katoohan nga wala siya'y hinigugma. Husto sa barug ang dalaga, taas og buhok nga gituyo niini sa pagpabuwagaw nga nakapasamot sa iyang kaanyag. Labaw sa tanan nga nakapadugang sa kaanyag ni Tessa mao nga de-kotse kini nga pagka-dalaga.

"Ikaw Glenn pila kabuok ang imong steady pagka karon?" mibawos pagpangutana si Tessa ngadto sa air-con technician. Naglisud sa pagtubag si Glenn kay ang tinuod aduna siya'y girlfriend apan bugnaw na ang ilang tinagdan. Nabalaka siya nga kun tug-anan niya si Tessa nga duna siya'y girlfriend, basin og dili na kini makigsuod kaniya.

Apan nahukman gayud ni Glenn nga dili mamakak. "May girlfriend ko Tess apan wala na kami maayo nga relasyon. Uyab lang kun magkita kay wala na ko ganahi nga magtuman sa gusto, mag-uban-uban sa mga barkada nga mga lalaki," ni Glenn pa.

Gipasabot ni Glenn si Tessa nga dili niya mahimong uban-ubanan kanunay ang iyang girlfriend kun makig-uban sa iyang mga barkada kay aduna siya'y trabaho. Nabantayan ni Glenn nga mipahiyom si Tessa nga nagsud-ong kaniya.

"Buotan ka diay Glenn kay gipalabi man gayud nimo ang imong trabaho kay sa pag-uban-uban sa imong girlfriend nga makigpanuroy lang uban sa iyang mga barkada," matud ni Tessa. "Sagdi lang Glenn makakita ka ra gihapon og babaye nga ikasabot nimo nga pareho kanimo og panglantaw sa kinabuhi," dugang ni Tess.

Giparking ni Tessa ang kotse kilid sa usa ka native nga kan-anan sa dalan Escario. Misulod sila og duna nay mga customer nga nagpaabot usab nga kasilbihan sa ilang makaon. Napasiga ang ilang mga mata kay nakit-an nila si Mr. Chiong nga nahibulong usab nga sila nag-uban.

Kaduolon-dili sila si Tess ug Glenn kang Mr. Chiong. (Sumpayan)