Gula 3
Hangtod karon gikapyotan pa sa kakapoy ug kaluya ang kalawasan ni Maambong gumikan sa kadaghan sa iyang nainom. May panagsang kasakit nga mouylap sa iyang ulo. Apan milugos gayod siya pagtaak sa lasang aron paglingawlingaw sa kapungot nga nagluoy sa iyang kahiladman. Mora siya’g gidaman.
Mibati og dili tiaw nga kalagot si Maambong sa gisangpotan sa dula kagahapon. Ingon sa usa ka urom ang nahitabo kanila. Hangtod karon mapikal pa siyang maghunahuna sa naangkon nilang kaparotan. Dili lang niya tuyoon nga makapanglingo. Ingon sa dili siya makadawat sa ilang kapildehan ngadto sa team nilang Santino. Makadaghan na nila ikasangka sa korte ang Parokya Paglaom sa nagkadaiyang torneyo ug kanunay kining wala’y dag-anan kanila. Sukad masukad, kagahapon pa gayod nahitabo nga napilde ang Tribu Burukinto sa team ni Santino.
Hinuon, daan na silang nalango sa ilimnong makahubog sa ilang pagdula kagahapon. Nasudlan na sa espiritu sa bino ang ilang lawas. Gipaneguro na man gud nila nga sila gayod ang mahimong kampiyon mao nga nag-unauna na sila sa ilang selebrasyon. Kay kun sa termino pa sa mga batid sa basketbol, underdog kaayo ang Parokya Paglaom. Biya sa tapad. Busa masaligon kaayo si Maambong nga sila gayod ang modaog. Mao nga giihap na nila ang mga piso bisan wala pa mapusa ang mga itlog. -- Sumpayan pa