Trabaho ug gugma

Gula 3

Naghinam-hinam si Glenn nga nagpaabot sa pag-out ni Tessa sa trabaho. Sigurado siya nga ang daku-daku nga gibayad ni Mr. Chiong sa pagserbisyo niya sa upat ka air-con sa Insik didto sa ilang balay dili nila mahurot sa pagasto.

Nagkalingaw og basa-basa si Glenn og mantalaan samtang nagpaabot sa pagawas ni Tessa. Taud-taud, gidad-an siya'g coffee sa utility worker sa opisina. "Gipahatagan ka og coffee ni Ma'am Tessa sir," matud sa utility worker nga mibutang sa coffee sa gamay'ng talad.

Human og inom ni Glenn sa iyang coffee, gitan-aw niya ang iyang relo ug mao gayud ang pagtangkud niini nga alas singko. Nagkuba-kuba ang iyang dughan kay hapit na niya ikadeyt ang maanyag nga secretary ni Mr. Chiong.

Tuod, nagsugod na sa pagpanggawas ang mga tawo gikan sa opisina. Miduko si Glenn kay daghan ang mitan-aw kaniya nga klaro kaayo nga nahibulong kun kinsa ang iyang gipaabot sa mga kawani.

"Sori kaayo Glenn ha nga nagpaabot ka nako og dugay… tana adto na ta," matud ni Tessa nga nagkabiba sa iyang laptop bag.

"Mag-taksi lang ta Tess," giingnan ni Glenn si Tessa. Igo lang mipahiyom si Tessa ngadto kang Glenn. "Walay problema Glenn, duna ko'y service nga sakyanan sa kompaniya."

Misamot nga si Glenn daw gibati og kauwaw sa iyang kaugalingon. Natan-aw niya nga layo ra diay kaayo ang ilang kahimtang. Siya isip usa lang ka air-con technician samtang si Tessa maoy executive secretary ni Mr. Chiong ug giisyuhan pa gani og service nga sakyanan.

Mipaingon sila sa grahe luyo sa building. "Mideritso si Tessa didto sa driver's side sa sakyanan ug gibuksan ang pultahan. Miuna pagsulod si Tessa ug gibuksan ang pultahan sa passenger's seat. Pagbukas ni Glenn sa pultahan sa kotse, maoy misugat kaniya ang nangalimyon nga car airconditioner.

"Asa ta karon Glenn?" gisukna ni Tessa si Glenn. "Ikaw ang mahibawo Tess, ako ra'y bahala sa gasto," dali nga tubag ni Glenn.

Mipadagan sa sakyanan si Tessa. "Mohapit diay usa ko sa Basilica del Santo Niño kay Miyerkules man diay karon," giingnan ni Tessa si Glenn. "Sigi, no problem," ni Glenn pa. Didto moparking si Tessa sa parking area sa Cebu City Hall.

"Tigsimbahan ka ba Glenn?" gipangutana sa dalaga si Glenn. "Oo, kanunay ko nga mosimba Tess." Kilum-kilom na dihang migawas sila sa simbahan. (Sumpayan)