Trabaho ug gugma

Gula 2                                               

Samtang nangaon sila si Glenn ug Tessa, giduol sila ni Mr. Chiong. “Uy, maayo kay giabi-abi nimo si Glenn Tess kay nakalimot ko og paila-ila niya kanimo,” matud sa manager ni Tessa.

“Walay problema Sir kay ang kahigayonan maoy nagtugot nga magkaila ming duha,” matud ni Glenn ngadto sa iyang kliyente sa air-con repair. “Balaknon ka man diay usab Glenn. Kun mahuman ka na, anaa daghang beer diha,” ni Mr. Chiong pa. Gibiyaan silang duha ni Mr. Chiong nga miabi-abi sa uban nilang mga bisita. Nalipay kaayo si Glenn kay bisan og yano ra siya nga air-con technician apan gihatagan siya’g pagtagad sa Insik.

Dali ra kaayo nga nagkasuod sila si Glenn ug Tessa sanglit komedyante man ang ulitawo. Misamot nga gaan kaayo ang buot ni Tessa kang Glenn. “Mahimo ba og kun may lugar bisitahan ko ikaw sa imong opisina Tess?” matud ni Glenn.

“Wala g’yuy problema Glenn kay kaila na gud mo si Mr. Chiong. Itumong og Biyernes sa udto kay bangkahan man g’yud mi ana pirmi ni Mr. Chiong og paniudto para apil ka,” nagngisi si Tessa nga mitubag sa ulitawo.

Milabay ang mga adlaw, giserbisyohan ni Glenn ang mga air-con sa balay ni Mr. Chiong. “Adto lang unya kuhaa sa opisina ang bayad Glenn. Ibilin lang nako ni Tessa,” matud ni Mr. Chiong nga daw nagdali pagbiya.

Pagkahapon, giadto ni Glenn ang opisina ni Mr. Chiong diha sa Fuente Osmeña. “Swerteha nimo Glenn uy nga maoy naka-service sa air-con ni sir kay daku kaayo ka’g nakwarta. Makabangka ka gayud ron,” matud ni Tessa.

Gipirmahan ni Glenn ang voucher ug gidawat ang tseke nga gihatag ni Tessa. Napasiga ang iyang mga mata kay P7,000 ang gibayad ni Mr. Chiong sa unom ka air-con nga iyang gilimpyohan.

“Buotan gayud kaayo ni si Mr. Chiong no? Bangkahan ta unta ka Tess apan dili na man kini mapailisan ang tseke kay sirado na ang bangko,” giingnan ni Glenn si Tessa.

“Bangkahan g’yud ko nimo Glenn? Sigi, pirmahi lang na sa luyo kay ako lang ka hatagan og cash,” matud ni Tessa nga miabli sa iyang metal cabinet. Nalipay kaayo si Glenn nga midawat sa kwarta gikan ni Tessa.

“Huwaton na lang tika Tess kay hapit na man usab alas singko. Adto ko sa gawas sa opisina maghuwat nimo. Wala ba’y mosundo nimo ron Tess?” matud ni Glenn. “Sigi huwata ko sa waiting area Glenn.”

Wala gayud damha ni Glenn nga masuod dayon niya ang secretary ni Mr. Chiong. – (Sumpayan)