Usa si Glenn nga mitambong sa birthday party ni Mr. Chiong, ang insik nga magpapatigayon nga nahigala niya samtang nagpaayo kini sa aircon sa iyang kotse.
Aircon technician si Glenn ug nakadayeg kaayo si Mr. Chiong sa iyang serbisyo nga gibaliwala ra ang iyang paniudto basta mahuman lang pagdali ang gitrabaho niya nga pag-ayo sa wala na kaayo mobugnaw nga air-con sa iyang sakyanan.
Wala niya sipyata ang pagdapit ni Mr. Chiong nga motambong sa iyang birthday bisan og mauwaw gayud unta siya kay wala man siya’y barkada. Apan wala mahanaw sa iyang huna-huna ang gisulti ni Mr. Chiong.
“Daghan ko og aircon sa balay Glenn nga wala na kaayo mobugnaw ako to nga paserbisyohan nimo,” ni Mr. Chiong pa.
Sanglit maayo mohatag og bayad si Mr. Chiong, nahuna-huna ni Glenn nga makakwarta gayud siya kun maserbisyohan niya ang mga aircon sa Insik. “Maayo kay mianhi ka g’yud Glenn. Nindot nimo pagkasulda ang evaporator sa aircon sa akong kotse. Wala na gayud mawala ang kabugnaw. Dali serve yourself, ayaw kauwaw,” matud sa buotang Insik.
Milinya si Glenn uban sa mga tawo nga magkuha og pagkaon. Nagsunod kaniya ang usa ka batan-ong babaye. “Ikaw una’g kuha og food. Sunod lang ko nimo,” giingnan ni Glenn ang babaye.
“Thank you, gentleman ka g’yud da,” matud sa babaye nga mipahiyom kang Glenn. “Kaila diay mo ni Sir Chiong?” nangutana ang babaye kang Glenn.
Gitug-anan ni Glenn ang babaye kun ngano nga gikaila niya si Mr. Chiong. “Aw, ikaw diay ang giingon ni Sir nga buotan nga aircon technician nga bisan og tingpaniudto na wala gayud mohunong pagtrabaho aron mahuman pagdali ang pag-ayo?”
Nasayran ni Glenn nga secretary diay ni Mr. Chiong ang maong babaye. “Inighuman nimo’g kuha og pagkaon, adto na didto lingkod sa unahan,” matud sa babaye.
“Ako diay si Glenn,” nagpaila si Glenn sa batan-ong secretary ni Mr. Chiong. “Tessa ang akong ngalan Glen.”
Bisan og gigutom si Glenn, apan gipugngan niya ang iyang kaibog sa mga pagkaon. Mauwaw siya ni Tessa.
“Wala diay ko masayop sa akong gihimo nga ikaw ang gipauna nako pagkuha’g pagkaon kay pinaagi niini nagka-amiga ta,” matud ni Glenn kang Tessa. “Mao g’yud, hanga ‘sab ko sa imong pagka gentleman,” matud sa dalaga. (Sumpayan)