Duha ka dagway sa usa ka tawo

Gula 24

Nabara ang mga sakyanan. Didto sa unahan, nalantawan nila ang tulo ka sakyanan sa kapolisan nga nag-urong sa daplin. Nagpunsisok ang mga tawo dapit sa may simbahan.

“Dili na kita makalahos sa unahan, Ma’am,” giingnan siya sa driver. “May nagkabangga man tingali nga mga sakyanan nga maoy hinungdan sa paghuot sa trapiko.”

“Mokanaog na lang ko dinhi, Noy,” niya pa dayong bayad sa kantidad nga narehistro sa metrohan sa taksi.

Mikanaog si Claire sa taxi.Maglakaw na lang siya paingon sa gipuy-an ni Cecille sukad sa iyang gikanaogan. Layo-layo pa ang gipuy-an ni Cecille sukad sa iyang gikanaogan. Apan wala siya’y kapilian. Mapugos gayod siya sa pagbaktas tungod kay dili man kaagi ang mga sakyanan.

Misugod dayon siya paglakaw. Misantop sa iyang hunahuna nga mohapit na lang pagpangusisa kun unsay hinungdan sa pagkabara sa mga sakyanan. Maagian man gayod niya ang simbahan diin nagpunsisok ang mga tawo, pahimuslan na lang usab niya pagsusi kun unsay gikagubtan sa mga tawo.-- Sumpayan pa