Gula 23
Trangkaso ra hinuon ang sakit niini. Pero misantop sa iyang hunahuna nga tingali’g migrabe ang sakit ni Cecille. Nahasol siya pag-ayo.
Mibalik na siya sa iyang lawak ug mihigda. Pero dugay siyang nakabalik og katulog kay gisugkay og maayo ang iyang hunahuna sa kahasol sa bad-on nga gisundalisa sa iyang damgo.
Udto nang namata si Claire. Migawas siya sa iyang lawak. Mipadulong sa banyo ug naligo. Pagkahuman, nag-ilis siya ug migawas sa balay. Mipalit siya’g pagkaon sa restawran nga nahimutang dili layo sa balay nga iyang gipuy-an.
Human makakaon sa nalangan nga pamahaw, milakaw siya. Nakahunahuna siya sa pagduaw kang Cecille, ang kauban niya sa pagpanginabuhi sa kagabhion. Buot siyang magsusi sa kahimtang niini ilabi na nga nasayran niya nga gitrangkaso kini.
Nagpahatod siya’g taxi paingon sa gipuy-an ni Cecille sa Alang-alang. Dihang nagkaduol na sila sa simbahan sa Alang-alang, nag-aginod na ang dagan sa taxi nga iyang gisakyan. Naghuot ang trapiko. -- Sumpayan pa