Rason o reputasyon

Kun mumulta lang ka, P150 ray gasto. Unya kun magpahimo ka’g Affidavit aron di ka kamulta, P300 imong bayranan sa Affidavit dala notaryo. Hain may maayo’g mumulta lang ka? Aron minusminus ang gasto?” ni Marita ngadtong Edgar, sekretaryo ni Padre Romy, kuraparuko sa San Sebastian Parish sa baryo Arlegui. Naghinabi ang duruha ning sayong kahaponon sa opisina sa pari sa konbento.

 Bag-o lang si Padre Romy ug Edgar dinhing parukyaha. Wa pay usa ka bulan. Gikan sila sa siyudad sa Bogo. Hulip si Padre Romy ni Padre June nga niretiro human sa 40 ka tuig nga serbisyo ining parukyaha. Si Marita, leader sa CWL, dagang guwang. Maoy madaling mapalihug ni Edgar mahitungod sa iyang problema. Sa didto pa siya sa Bogo, leader sa choir si Edgar. Unya pagbalhin nila dinhi’s Arlegui, wa nikuyog ang sekretaryo sa pari. Si Edgar ang nikuyog unya na-promote nga sekretaryo sa pari. Bag-o lang siya ining trabahoa. Unya naproblema dayon.

Tulo ka semana na ang nakalabay, dunay gikasal si Padre Romy. Gihikay ni Edgar ang mga papeles. Unya gihipos lang niya sa hunos sa iyang lamesa ang Marriage Contract nga pirmado sa kinasal, mga sponsors ug sa pari. Wa siya magdahom nga duna diay nay tagal nga panahon sa pag-report o rehistro sa dokumento ngadto sa Local Civil Registrar. Sa niaging adlaw lang niya gi-report ang maong kasal. Nilapas na ang kinse ka adlaw. Gisitar dayon siya sa Local Civil Registrar nga pabayron og multa nga P150.00 for late filing. Mao pay pagkasayud ni Edgar nga sulod lang diay sa kinse ka adlaw gikan sa pagkasal, kinahanglang i-report ang maong kasal.

Nihangyo si Edgar nga pasayluon lang siya. Di lang pamultahon. Kay bag-o lang siya ining trabahoa. Wa pa siya’y kalibutan sa patakaran. Giingnan siya ni Mrs. Edith Seno, mismong Local Civil Registrar sa lungsod sa Bastides nga mosumiter lang siya’g Affidavit isip rason kun nganong nalangan ang iyang pagsumiter sa Marriage Contract. Kun makasumiter siya’g affidavit, dili na siya pamultahon. Wa pa siya’y kailang abogado sa Arlegui. Busa nagpakitabang siya ni Marita nga lumad nga taga-Arlegui.

Nakapahiyom si Edgar nga naglingkod sa plastic nga lingkuranan tungod sa iyang lamesa. Nihapohap sa iyang suwang. Nitutok ni Marita nga naglingkod sab sa plastic nga lingkuranan dikit sa tuong tomoy sa lamesa. “Nganong nipahiyom man ka? Nalipay ka nga mas barato ang multa kay sa affidavit?” ni Marita. “Nalipay ko nga duna diay kay abogado nga makatabang nako. Andam kong mobayad og P300 alang sa affidavit” ni Edgar. “Kun mumulta lang ka, katunga ra imong gasto. Unya kun di ka mumulta, doble imong gasto. Wa nimo gamita imong arithmetic” ni Marita.

“Dili arithmetic ang punto ana, Sister Marita” ni Edgar nga nagbinayot og tuno. Apan dili siya bayot. “Unsa man diay imong punto?” ni Marita nga nihikohiko sab. “Ang akong dungog isip sekretaryo. Kun mumulta ko, duna na koy record nga sad-an, maong nakamulta. Samtang kun di ko kamulta kay nipahimo og affidavit, limpiyo akong dungog. Mas bililhon akong dungog isip sekretaryo sa pari. Dili kabayra’g P300 lang,” ni Edgar. “Sakto sab. Kay matud pa, Your good reputation in 20 years, can be ruined in 20 seconds,” ni Marita.

Niabli si Edgar sa usa ka hunos sa lamesa. May gikuha. “Nia sister o. P500 ni. Pangtaksi nimo ang sobra. Ipahimo na ko’g affidavit. Pasabta ang abogado sa nahitabo kun nganong nalangan ang pagsumiter nako sa Marriage Contract” ni Edgar, nagtunol sa papel de banko ibabaw sa iyang lamesa ngadto sa kaistorya. “Nahala” gidawat ni Marita. “Nakasabot na ko nga mogasto gyud ka’g dako pagdepensa sa imong reputasyon.”

“Salamat kaayo, Sister Marita, sa imong kahago sa pagtabang nako. Makabawos ra unya ko nimo sa imong kaayo” ni Edgar. “Don’t mention it. It is my pleasure to be of assistance to a good man like you” ni Marita nga mapahiyomon. Nitindog ug nibiya sa opisina. Mapahiyomon sab si Edgar nga nisunod og tan-aw ni Marita. Ulitawong guwang sab siya. (Kataposan) (Sa magbabasang gusto’g libreng konsulta, dad-a ning pahina sa opisina sa tagsulat. Iatol og Sabaodo sa buntag)