Gula 20
“Dili. Lain ni. Kaila nako. Usa ka beteranong brodkaster sa radyo.”
“Uy, tiguwang na diay kana?”
“Medyo. Kapin na sa 60 ang edad.”
“Nganong ako man ang imong girekomendar ngadto nianang tawhana? Kang Cecille na lang unta kadto nimo siya gihatag. Di ko ganahan og tiguwang. Kapoy kaayo ug laay kay kita’y momaneho. Matagbaw pa ta’g ugay-ugay aron mamostura.”
“Ay, unsaon nga ikaw man ang nakursonadahan niya? Gawas pa sab, nag-text si Cecille nako, nagpahibalo nga dili siya maka-duty karon kay gitrangkaso siya. Mao nga ikaw na lang gyud. Agwantaha na lang gud nang tiguwang. Ang importante mao ang kuwarta.”
Nanghupaw siya.
“Wa ba diay mobalik kadtong kustomer nga imong gihatag nako kagabii?” Gipangutana niya si Onyok.
“Wa man,” ni Onyok pa. “Pero nganong nangita ka man niya? Maayo ba siyang modala’g dula sa kama?”
“Di na kinahanglang masayod ka sa hinungdan. Basta kun moanhi siya, ayaw baya gayod siya ihatag sa lain. Areglado ba?”
“Areglado kaayo. Ako’y bahala.” -- Sumpayan pa