Ang unang halok ni Melinda ungo

Daghan ang nahibulong sa kalit nga pagdako ni Melinda. Sa pangidaron niya nga trese anyos makita na ang gidak-on ug gitas-on niini nga mora nag usa ka hingkod nga dalaga. Matud pa sa iyang inahan nga si Tasya wala pa man kuno reglaha si Melinda, busa, wala pa kini madalaga.

Apan dunay miingon nga si Melinda liwat kuno sa amahang Aleman ug maong dakoon gyud siya nga pagka-bata. Ug kay mora na mag dalaga nang tan-awon ang bayhon ni Melinda daghan nang ulitawo nga misuway sa pagpadayag sa ilang gugma sa dalagita.

Usa niini mao si Jimmy, ang anak ulitawo ni Sidra-Pilong. Biyuda na si Sidra ug nagpuyo sa kaharuhay kay mao may nakasunod sa dakong kabtangan sa mga ginikanan niini. Matag hapon mamisita gyud si Jimmy sa dalagita.

Ug kay wala pa lagi madalaga si Melinda maong si Tasya maoy moatubang sa kutob nga mamisitang ulitawo sa iyang anak. Unya usa ka hapon dihang may gilakaw si Tasya kay dunay gipalit sa merkado, may usa ka hilumong ulitawo nga kalit lang mitumaw sa balay nilang Tasya aron mamisita kang Melinda. Ug nahitabo nga si Melinda ang miatubang sa ulitawo.

“Hala, uy, di pa ra ba mosugot si nanay Tasya nga dunay mamisita nako kay wala pa man ko madalaga,” ni Melinda pa nga ingon gibati’g kaulaw niining ambongang ulitawo nga namisita kaniya.

“Nahibaw man ko ana, Melinda, mao bitaw nga gitayming nako nga wala karon dinhi si nanay nimo aron ikaw ang moatubang nako,” nagkanayon ang ulitawo. “Ako diay si Manolito...ug Manol ang akong angga. Taga sityo Dugo-Kilomkilom ko sa silingang baryo...”

“Di ba dapit man na sa mga ungo...kanang sityo Dugo-kilomkilom ug kahadlokan man kuno nang sityoha, di ba?” mora’g wala sa hunahuna nasulti ni Melinda kining maong mga pulong.

Wala dayon makatingog si Manolito. Ingon sa duna siya’y lawom kaayong gihunahuna. Unya...

“Bitaw, gidungog man nang among dapit nga pinuy-anan sa mga ungo, pero di man na tinuod. Wa may ungo sa among dapit,” hinay’ng tubag ni Manolito. “Kuan diay, may ihatag ko nimong singsing, basin makaayon ka...”

“Singsing?”

“Oo, singsing,” ug gipakita ni Manolito kang Melinda ang singsing. “Nia, o, husto kaayo ni nimo...”

Pagkakita ni Melinda sa singsing gibati siya’g kaibog niini. Unya, wala sa iyang hunahuna nga iya kining gikuha gikan sa mga kamot ni Manolito ug unya iyang gibutang sa tudlo nga sunod sa iyang kumingking. “Hala, uy, husto lagi kaayo, di ba, no?”

Miyango si Manolito. “Oo, imo na kana. O, sige, di lang ko magdugay. Mora’g kilomkilom na man...” ug mikanaog kini nga ingon sa nagdali. Wala dangti’g dugay miabot si Jimmy, nagdala kini’g bulak sa rose ug nasigpatan niini ang singsing diha sa tudlo ni Melinda.

Gidali og suksok ni Melinda ang iyang tuong kamot sa ilawom sa pasistor. Ug samtang nakighinabi si Jimmy kang Melinda milihok ang hinagiban sa iyang pagka-lalaki ug iyang gihagkan ang dalagita sa aping. Miantihay ang dalaga kay dili siya gusto.

Tungod niini, mitindog si Melinda ug misulod sa kuwarto biniyaan si Jimmy nga nagpanawag sa ngalan sa dalagita. Wala’y nahimo ang ulitawo kay wala na man gyud moatubang kaniya ang dalagita.

Didto sa kuwarto ni Melinda may nabatyagan siyang ingon sa nanginit ang iyang lawas ug mihugot ang singsing sa iyang tudlo. Gigil-asan siya. Gusto siya’g usa ka halok sa usa ka lalaki, ug sa iyang ngabil gyud ipuntariya ang halok. Busa, migawas siya apan wala na si Jimmy, nakalakaw na. Mingaw na karon ang gabii ug wala siya makasabot sa iyang gibati. Taudtaod mitungha si Manolito ug mihalok kini sa iyang mga ngabil. Dugay ang panagtapot sa ilang mga ngabil ug hangtod nga nalimot silang duha.

Pagkahuman sa ilang gibuhat, gihuwasan si Melinda.

“Hala, uy, may nahitabo man diay nato, Manolito,” ni Melinda pa. “Kasab-an gyud kong nanay ini...”

“Ayaw kahadlok kay gikan karong gabhiona hangtod sa daghan pang mga gabii, magkuyog na ta. Ug adto ka na unya mopuyo sa sityo Dugo-kilomkilom kay nahisama ka na man nako nga usa ka tawo nga mosuyop og dugo. Oo, ungo ko, Melinda, ug ikaw nga usa ka birhen, maoy himuon kong asawa...” ug gikuptan ni Manolito ang suwang sa dalagita.

Taudtaod nausab ang ilang mga hitsura nga usa ka mga mangtas nga ungo. Ug si Melinda miuban kang Manolito paingon sa sityo Dugo-kilomkilom ug lanog kaayo ang ilang mga tingog nga nagkanayon: “Wakkkkk....wakkkk...wak-wak!! wakkkk!” (Kataposan)