Ang tabang ni Lola

Gula 6

Gikulbaan kaayo si Maricor nga tingali’g hilabtan ni Siegfred si Ruben. Nasayud siya sa batasan sa iyang boyfriend. Kalma ra nga naglingkod si Ruben nga mora’g wala lang mabalaka sa hulga kaniya ni Siegfred.

“Dili nimo siya angay’ng mahimong bana Maricor kay dugay na ko nga nakadungog nga kana si Siegfred nalambigit man gani sa pagpatay niadtong silingan nato nga gitulis sa miaging tuig,” matud sa apohan sa dalaga.

Mitingkag ang dunggan ni Ruben nga nakadungog sa gisulti sa Lola ni Maricor. “Tambag nako nimo Dong, ugma na lang sa buntag pauli kay basin og dunay dautang plano kanimo si Siegfred.”

Gituman gayud tuod ni Ruben ang gitambag sa Lola ni Maricor. Wala masayop ang apohan ni Maricor kay taud-taud samtang sila nagsultihanay og si Ruben, nasigpatan nila nga nagpaantaw si Siegfred sa unahan nga mora’g dunay gihuwat.

“Sige dinhi ka lang matulog Dong, mouna lang ko nimo’g katulog ha,” matud sa apohan ni Maricor. Taud-taud, migawas si Maricor gikan sa iyang lawak nga daw gikuyawan.

“Manirado na ta sa balay ug pagngon na nato ang suga aron magtoo si Siegfred nga nakalakaw ka na Ben,” matud ni Maricor. Napawong na ang suga apan diha pa gihapon sila sa sala si Maricor ug Ruben.

Mitingog na usab ang selpon ni Maricor. “Hello, Oo tua na siya, diri miagi sa pikas agianan kay nahadlok nimo. Dili na ko mogawas kay kasuk-an ko ni Lola. Ikaw man gud, nanghulga ka man,” giingnan ni Maricor ang iyang gikasulti sa pikas linya.

Gipawong ni Maricor ang selpon. “Gikapoyan na ko niining akong boyfriend uy kay maldito. Wala usab makagusto kaniya ang akong Lola.” Bisan og gikuyawan, apan gibati og gamay’ng kalipay si Ruben.

“Kun mao kana Mar, basin og may porohan na nga imo ko nga sugton sa akong gihalad nga gugma nimo,” ni Ruben pa. Wala dayon motubag si Maricor apan wala usab kini mobalibad.

Migawas ang Lola sa dalaga. “Uy, nagpawong man kamo og suga diha. Mas maayo pa og si Ruben maoy imong himoong boyfriend Maricor kay matinabangon pa kaayo nga pagkatawo.”

Nakapahiyom si Ruben sa iyang nadungog gikan sa tiguwang. “Bitaw Mar, sugta na lang ko para may rason ka na gayud nga buwagan kadto si Siegfred.”

“Apan kun sugton ko ikaw Ben, sigurado ko nga makabaton gihapon ta og problema kay maldito nga pagkatawo si Siegfred,” matud ni Maricor. (Sumpayan)