Ang tabang ni Lola

Gula 5

Nagdungan sila’g kaon si Maricor ug Ruben. Sa hilom gikahinangop kini sa ulitawo kay sa unang higayon gikauban niya pagpangaon ang babaye nga nakat-onan na niya sa pagmahal.

Taliwala sa ilang pagpangaon, mitingog ang call alert sa selpon ni Maricor. Gitan-aw kini sa dalaga ug dayon gipindot nga mora’g nasabtan ni Ruben nga gikansel ang tawag. Apan taud-taud, mitingog na usab. Wala kini tubaga ni Maricor.

“Kinsa ba kanang nagsigi’g tawag nimo Maricor? Kasamok ba ana nga duna kay bisita,” matud sa Lola sa dalaga. Wala na makaantos si Maricor sa pagsigi’g ring sa iyang selpon, iya kining gi-off. “Ang imo ba nga boyfriend ang nanawag kanimo?” ni Ruben pa.

Wala dayon motubag ang dalaga. “Nakit-an ko kamo didto sa SM kaniadtong miaging Lunes nga mangaon unta sa Food Court, apan imo man siya nga gitalikdan Mar,” matud ni Ruben.

“Nakakita ka diay namo adtong higayona? Nasuko kadto siya kay nabasahan man niya sa akong selpon ang imong mga text messages ug nagtoo nga duna kita’y relasyon,” pasabot ni Maricor. Miyango si Ruben nga nakasabot na kun ngano nga nag-away sa maong higayon ang mag-uyab.

Wala madugay, nadungog nila nga adunay motor nga mihunong atubangan sa balay sa apohanni Maricor. “Dia si Siegfred Maricor nangita nimo, wala usa nako pasudla ,” matud sa ig-agaw’ng babaye ni Maricor. “Hala! Dia siya?” daw nakuyawan ang dalaga pagkasayod nga miabot ang iyang boyfriend.

“Maldito ra ba na si Siegfred basin og unsay himuon niya kang Ruben,” matud ni Maricor nga daw gitugkan na og kakulba. Gawason na unta ni Maricor ang iyang boyfriend apan uwahi na kay diha na kini sa pultahan. Nabasa nila sa panagway niini nga may gihambin kini nga kasuko.

“Mao diay nga wala kay gana nga motubag nako sa selpon kay duna ka diay bisita nga lalaki! Boyfriend ko ni Maricor bay!” hait ang tingog ni Siegfred nga mitug-an niini ngadto kang Ruben. Wala lang magtingog si Ruben ug naniid lang siya sa mga lihok ni Siegfred.

“Magpili ka kanamong duha Maricor. Ug ikaw, lalaki, isog ka ra kaayo nga mianhi sa balay sa akong girlfriend. Magmatngon ka kay kun ikaw ang iyang pilion, dako ka og problema nga atubangon!” matud ni Siegfred. Natagbaw og patunga si Maricor aron walay mamugna nga away tali kanila ni Ruben ug Siegfred.

Mibiya si Siegfred nga nagpaminti sa kasuko. (Sumpayan)