Gula 4
Wala na mo-reply si Ruben sa text ni Maricor kaniya. Natulog pagbalik ang ulitawo. Pagka-ugma, gisubli pagbasa ni Ruben ang nadawat niya nga text gikan ni Maricor. Ingon siya sa nasubo kay wala ilimod sa dalaga nga aduna siya’y boyfriend.
Usa ka udto, didto nag-lunch si Ruben sa usa ka restaurant sa dakung mall sa North Reclamation Area (NRA).
Dihang hapit na mahuman og kaon ang ulitawo, napasiga ang iyang mga mata kay nakit-an niya si Maricor nga may kaubang lalaki.
Miduko pagdali si Ruben ug milingiw aron dili dayon mailhan sa dalaga kun makakita kaniya. Nangaon usab sila si Maricor ug ang iyang kauban nga sa iyang tan-aw mao ang iyang hinigugma.
Sanglit didto kini mulingkod sa layo-layo ra, wala makakita si Maricor kang Ruben nga nagpaniid ra diay kaniya. Wala makasabut si Ruben sa iyang gibati. Apan nasabtan ni Ruben nga naglalis si Maricor ug ang iyang kauban.
Wala masayop si Ruben kay mitindog si Maricor nga wala pa gani makasugod sa pagkaon ug misirit sa paglakaw. Gisuwayan kini’g tawag sa lalaki apan wala na gayud mamati.
Nakita ni Ruben nga ang lalaki igo lang mitilaw og gamay sa pagkaon agi’g respitar, dayon mitindog ug milakaw. Nasabtan ni Ruben nga nag-war si Maricor ug ang iyang boyfriend.
Wala manghilabot si Ruben sa personal nga isyu sa mag-sweetheart. Misamot nga wala makasabot ang ulitawo sa iyang gibati nga nakakita na siya sa boyfriend ni Maricor.
Tan-aw ni Ruben may pagkamaldituhon og dagway ang maong lalaki. Pipila ka adlaw nga wala na sila mag-text si Maricor ug Ruben. Hangtud nga miabut ang Sabado. Wala damha ni Ruben nga nakadawat siya’g text ni Maricor.
“Nag-remind diay si lola sa iyang invitation nimo unya sa iyang gamay’ng hikay Ben. Ari unya kay wala na man ka maka-text sa milabay’ng mga adlaw,” matud ni Maricor.
Wala motubag si Ruben sa text, apan nahukman niya nga mutambong sa birthday. Gusto ni Ruben nga respitahan lang ang pagdapit sa apohan ni Maricor nga iyang natabangan pagkobra sa iyang cash incentive sa City Hall.
Giadto ni Ruben ang higala niya nga opisyal kaniadto sa Office of Senior Citizens Affairs. Nangayo siya’g Chalico sa mga senior citizen nga wala pa magamit kay iyang ihatag nga gift sa lola ni Maricor.
Nalipay gayud tuod ang lola ni Maricor sa iyang gift. “Sige pagdungan mo’g kaon si Sir, Maricor,” giingnan sa apohan ang iyang dalaga nga apo. (Sumpayan)