Gula 2
Gitabangan ni Ruben ang babaye aron makobra pagdali ang cash assistance sa tiguwang. Iyang giduol ang higala niya nga usa sa mga division chief sa City Treasurer’s Office.
“Ayaw kabalaka, tawgon ra kuno ta niya kay iya na nga gitan-aw ang masterlist. Yuna, sige man lang ta’g estorya nga wala magkaila, ako diay si Ruben,” dayong tunol ni Ruben sa iyang kamot sa babaye.
“Maricor ang akong ngalan ug akong Lola kanang tiguwang,” matud sa babaye nga nagpahiyom human midawat sa kamot ni Ruben. Nagbayloay dayon sila og mga kontak numbers sa selpon.
Wala tuod magdugay, gitawag na ang ngalan sa apohan ni Maricor. Gitabangan nila’g agak ang tiguwang aron makaduol sa disbursing officer ug makapirma ug dawaton ang iyang P3,000 nga cash assistance.
“Salamat gayud kaayo ha? Kun wala pa mi nimo tabangi madugay gayud mi sa pagkobra unya gihilantan ra ba ni si Lola,” matud ni Maricor.
“Mao ba Mar? Yuna, huwata na lang ko kay magpa-isyu usa ko og sedula dayon ihatud ko kamo sa inyo kay lisud ni Lola ang pagsakay-sakay og jeep,” tanyag ni Ruben kang Maricor.
Ingon sa gibati og kauwaw ang tiguwang. “Ayaw na lang Sir, magtaksi na lang mi pauli kay dia may gamay’ng kuwarta nga akong nakobra.”
“Ayaw Lola, ayaw kana og ibani ang imong nadawat nga cash assistance. Maayo na lang kana nga magamit nimo pagpalit og tambal. Walay kaso kay nag-test run pa man usab ko sa bag-o nako nga napalit nga awto,” dali nga tubag ni Ruben.
Sa elevator sila miagi. “Wala man diay mi mahibalo nga duna diay elevator, lisud kaayo mi pagsaka sa hagdan kaganina,” matud ni Maricor. Wala na motubay pa si Ruben kay naabot na man dayon sila sa ground floor.
“Tana, naa ko nag-park dapit sa parking area ni Vice Mayor Young,” giingnan ni Ruben si Maricor nga nag-agak sa iyang apohan. Gipahiluna ni Ruben ang apohan ni Maricor. “Sige tupari na lang si Lola diha Mar, asa gani to ang inyo?” ni Ruben pa.
Mipasirit dayon si Ruben sa pagpadagan dihang giingnan ni Maricor nga tua sila nagpuyo sa Inayawan. “Tukma usab kay adto ko magpa-renew sa rehestro sa sakyanan sa LTO-Talisay,” matud ni Ruben.
Daplin sa karsada ang balay nila ni Maricor. “Salamat kaayo sa imong paghatud Dong ha?,” matud sa tiguwang. “Salamat kaayo Ben,” ni Maricor pa. Mibiya si Ruben ug misirit paingon sa LTO-Talisay. (Sumpayan)