Duha ka dagway sa usa ka tawo

Gula 12

“Ambot lang. Basta, para nako, segurado nang barbekyuhon ni Satanas ang akong kalag sa impiyerno.”

Mipatunga kanila ang kahilom.

“Motuo ka ba sa The Da Vince Code?” Gipangutana ni Claire si Ryan.

“K-kay ngano man diay?” Misumbalik pagpangutana ang pari. “May nahibaw-an ka ba diay kun unsay naa sa maong libro?”

“Wa gyud ko makabasa sa maong libro. Pero nakadungog ko’g estorya nga mabasa kuno sa maong libro nga may relasyon sila si Jesus ug Magdalena.”

“Husto ka. Pero wala’y basehan ang pangangkon sa tagsulat nga may relasyon sila si Jesus ug Magdalena. Ang The Da Vince Code usa ka nobela, usa ka work of fiction nga mugna lang sa lihokang imahinasyon sa magsusulat. Mas katuohan ang asoy sa Bibliya mahitungod sa pagkatawo, pagkamatay, pagkabanhaw ug pagkayab ni Jesus ngadto sa langit.

Wala motingog si Claire. Mipitokpitok lang ang iyang mga mata. -- Sumpayan pa