Dear Tita Salie,
Maayong adlaw. Kanunay gyod ko nga mobasa sa imong column tungod kay daghan kaayo ko ug makat-onan sa imong mga tambag. Mao nga gusto unta pod ko nga mangayo sa imong advice.
Tagoa lang ko sa pangalan nga Fe, taga Inabanga, Bohol apan ania karon dinhi sa Cebu tungod kay dinhi man ko nakakita og trabaho.
Ang akong problema mahitungod kini didto sa among lugar sa Inabanga, Bohol. Pobre kaayo mi, Tita, ug wala gyod mi kuryente sa among balay. Mao nga dako gyod ang kalipay sa akong pamilya dihang nadawat ko sa akong giaplayan nga trabaho dinhi sa Cebu kay makatabang na man unya ko sa akong mama ug papa kay makapadala nako og kwarta.
Sa akong pagpanarbaho mao gyoy akong pangandoy nga makapakonek na og suga o kuryente silang mama ug papa. Busa ako gyod nga gitigum ang akong sweldo, wala gyod ko magpalitpalit kay gusto nako nga dunay kuryente ang among balay aron dili na maglisod silang mama ug papa ug ang akong mga igsuon sa ilang pagtuon.
Apan dihang ni-apply na mi og linya sa kuryente wala permahe ang among application sa Mayor kay kuno wala mi mibutar kaniya. Sakto ba ang gibuhat sa Mayor, Tita, nga mobayad man unta mi? Nganong ila pa man kining himoon nga isyu nga dili man kini maayong tan-awon namong mga batan-on?
-- Fe
* * *
Maayong adlaw Fe. Dili gyod maayo ang gibuhat sa inyong mayor diha sa inyong lugar. Ang insakto mao nga dili na niya hunahunaon pa ang nahitabo during sa election kun kinsay nibutar kaniya ug kinsay wala. Dapat unta niyang tan-awon nga lahi ang election ug lahi ang karon nga naglingkod na siya as mayor.
Dili gyod tanang tawo mobotar sa usa ka kandidato, dili tanang tawo nibutar sa inyong mayor sa panahon sa election, apan dili kini buot ipasabot nga dili tanang tawo iyang serbisyohan, nga ang nibutar lang kaniya ang iyang alagaran. Tungod kay siya man ang mayor, nibutar man niya o wala, basta lumolupyo ug sakop sa iyang jurisdiction as mayor kinahanglan gyod niyang alagaran. Kay ang ilang paglingkod dili lang alang sa uban kundili alang gyod sa tanan niyang katawhan.
Ipaglaban ang inyong karapatan as consumer. Dili puyde nga iyang babagan ang inyong karapatan. Against na kana sa government code ang iyang gibuhat kay adunay pantaypantay na karapatan ang mga consumer. Diretso na kamo ngadto sa opisina sa “Boheco” aron mo maka-apply alang sa inyong kuryente.
-- Tita Salie