Pagsulod nako sa abli na daan nga gate sa among gipuy-an sa Canduman ning alas diyes sa kabuntagon, gibati dayon ko’g kalagot. Nakita nako nga wa nag-parking sa iyang parkingan ang puti namong sakyanan nga Crosswind.
“Gipahuwaman na sab seguro sa akong kapikas nga si Almira!”
Maglagot gyud ko’g pahuwaman niya ang sakyanan kay ang mohuwam di kamao mopatubil og krudo. Kasagarang mohuwam akong manghod nga si Bobby. Usahay sab iyang manghud nga si Gerry.
“Karon lang gyud kang Almiraha ka!” tuaw nako sa hilom.
Gipaspasan nako akong lakang ngadto sa pultahan sa among balay.
Naglakaw lang ko gikang nagpatupi sa Big Brother Barber Shop duol sa merkado sa Canduman. Suki nako si Hilton nga nag-inusarang barbero sa maong barber shop. Kada semana ko nagpatupi aron mintin akong tupi nga ala Derek Ramsay.
Naanad nalang kong maglakaw kun magpatupi. Kay duol ra man ang distansiya gikan sa among gipuy-an ngadto sa barber shop. Akong gitayman ang akong lakaw. Siyete minutos lang padulong ngadto. Siyete minutos sab balik. Karon kay ting-init, nagsul-ob ko’g shades ug nagkalo og baseball cap.
Si Sheryl nga akong ikaduhang anak ug kamanghuran maoy nibayad sa down payment sa maong sakyanan. Second hand lang na. Slightly used, ingnon ta. Ug gitungaan namo ang bayranan nga binulan sa financing.
Gi-trade-in namo akong kotse nga sobra diyes anyos namong gamit. Nakaginhawa ko’g luag sukad nakapasar siya sa board exams pagka-Interior Designer. Daga pa siya. Apan may uyab na nga usa ka Architect. Si Martin.
Akong anak kamaguwangan si Sheena. Minyo na. Iyang bana si Jezreel nga maestro sa Carmen National High School. Si Sheena nagtrabaho kaniadto sa Green Meadow Call Center. Apan gipa-resign sa iyang bana kay magnegosyo na lang. Niasister karon si Sheena sa iyang aunt-in-law nga may convenience store sa Carmen. Singko anyos na si Fiona ilang kamaguwangan anak. Mabdos na karon sa Sheena sa ilang ikaduhang anak. Babaye kono gihapon, sumala sa ultrasound.
Si Almira niasister sab nako sa pagnegosyo’g karenderya sa tupad sa akong opisina nga gihimo nakong Accounting Firm. Usa man ko ka CPA. Ang among kita maoy nakapatungha sa among mga anak sa exclusive schools for girls. Sa kinder ug elementarya, silang duha nagtungha sa St. Francis of Assisi School, duol sa Redemptorist Church. Paghayskul nila, sa Colegio dela Inmaculada Concepcion. English paka ni sila pagtapos sa hayskul. Sa kolehiyo, diha sila sa University of San Carlos B.S. Psychology gikuha ni Sheena. Pagradwar, minyo dayon. Wa lang mi niangal mga ginikanan.
Ang amo natuman lang among obligasyon pagpaeskuyla sa mga anak. Bastante na. Wa mi nag-apas nga among mga anak mobawos og pabor sa among pagmatoto nila. Wa mi nag-apas nga among mga anak mobawos og pabor sa among pagmatoto nila. Para na lang na sa ila sang mga anak ugma damlag. Apan ang anak nga motabang, dili angay balibaran.
Si Sheryl nikuhag Fine Arts major in Interior Designing. Bilib ko niya kay number 9 sa board exams. Mapasegarbohon ming mga ginikanan nga nikuyog niya sa iyang oath-taking sa Manila. Makatabang na siya sa inadlaw namo nga gastohan. Daghan na siya’g kliyente, inabagan sa iyang uyab nga arkitekto. Manedyer karon si Sheryl sa usa ka Designing Firm sa Lahug.
Nagkahinay na man akong kita kay semi-retire na man ko. Tungod sa kaluya sa lawas tungod sa dayabitis, hayblad ug artraytis. Daghan kong gimintin nga mga tambal. Si Almira duna say gimintin nga mga tambal. Kay may dayabitis man sab siya.
“Almira! Kinsa na man say imong gipahuwam sa sakyanan?” nako pa nga pinabundak ang tono.
Kun may gikasuk-an ko, ibundak ko gyud iyang tibuok ngalan. Kun way sapot, angga niya nga Al, ang isampit nga malumanay. Niundang si Almira sa pagdigamo alang sa among paniudto.
“Naunsa ka Rudy? Nga ikaw may nagdrayeb sa sakyanan! Imo mang gihatod si Sheryl sa trabahoan! Diin man diay nimo biyae ang sakyanan?” niya pa nga pinabundak sab.
Nakahapak ko’s akong agtang. Giparking diay nako sa estasyon sa gasolina atbang sa barber shop. Ilhanan gyud nga tiguwang na ko. Limtanon na. Uwaw kaayo ko’s akong asawa. Nagdagan kong nibalik sa akong agi. (Katapusan)