Si ex diay

Dear Tita Salie,

Maayong adlaw ug komusta? Just call me Crimson, usa ka ulitawo. Ang akong problema kabahin kini sa akong girlfriend. Hapit na mag two years ang among relasyon.

Nasakpan man gud nako nga nagkontakay pa diay sila sa iyang ex. Sukadsukad wala pa gyod ni siya namakak nako, Tita, karon lang gyod ug tungod pa gyod sa iyang ex ang iyang pagpamakak.

Ka usa dunay ni-text niya. Ug matud niya nga iya kunong amiga ang ni-text ug gusto kining makig-panuroy niya. Apan akong nasayran nga ang iyaha diay’ng ex ang nakigpanuroy niya. Sa dihang ako siyang gi-confront mahitungod niini matud niya nga dili kuno ko angayang mabalaka kay atoa kini magtrabaho sa layong lugar.

Apan akong nahibaw-an nga duol ra diay ang ilang gitrabahoan. Ang akong uyab anaa sa Opon magtrabaho ug toa usab didtong lugara ang iyang ex.

2007 pa silang nagkaila ug taudtaod na usab silang nagbulag. Apan hangtod karon wala pa gyod nila kalimti ang usa’g-usa. Love pa kaha niya ang ex, Tita? Nag-call off mi karon kay mora og dili na nako makaya. Unsa may akong buhaton, Tita? Palihog pasabta ko. Thank you. -- Crimson

* * *

Maayong adlaw, Crimson. Mao kana ang maayong higayon nga imong hunahunaon o hinuktukan pag-ayo ang inyong relasyon. Mas maayo kanang space nga anaa kaninyo karon. Gamita lang panahon nga nag-call off mong duha, nga aduna moy space alang sa usa’g-usa for you to think kun inyo bang ipadayon ang inyong nasugdan nga relasyon.

Nakaseguro ko nga mahal gyod nimo pag-ayo ang imong uyab karon. Maoy hunahunaa kun kaya pa ba nimong pasayluon ang imong uyab. Madawat pa ba siya nimo sa imong kinabuhi human nimo siya masakpi nga namakak tungod ug alang sa iyang ex boyfriend.

Atong masabtan nga tingali kun ganahan pa gyod siya sa iyang ex tungod kay nakaako man siya sa paglimbong kanimo.

Apan kun nawagtang ang imong pagsalig kaniya, ayaw nalang pagpakig-uli sa imong uyab tungod kay segurado nga kanunay na lang mo nga mag-away tungod kay magsige na lang ka og duda kaniya. Tungod kay duna ka na may kasinatian nga iyang gilimbongan. -- Tita Salie