Nagngisi si Wenna nga milingi ngadto kang Miguel human nga nadungog niya ang gisulti sa ulitawo nga nangandoy kini nga siya unta ang nahimo niini nga hinigugma kaniadto.
“Abtika nimo Migs uy. Karon pa gani kita magkaila imo man dayon ko nga gipanguyaban,” matud ni Wenna. Igo lang mingisi si Miguel ug misuway pagpasabot sa dalaga.
“Kuan man gud Wen, nahuna-huna nako nga basin og maghinay-hinay ko, tingali og maunhan ko sa uban kay sigurado ko nga daghan gayud ang naninguha nimo bisan og duna ka nay anak,” ni Miguel pa.
Milingkud sila sa bakante nga lamesa. Miorder si Miguel og ilang makaon. “Wala ka masayop Miguel nga daghan gihapon ang naninguha nako apan wala na ko motagad nila. Swerte ka gani nga miuban ko kanimo karon,” matud ni Wenna.
Wala na mohimo’g follow up si Miguel sa iyang gibutyag nga pagbati sa dalaga. Apan sigurado siya nga nakasabot ang dalaga nga daku kaayo siya’g gusto kaniya kay gani dili niya kalikayan nga mopasiplat gayud sa madanihon niyang lawas.
Mga alas dies sa gabii na nga gihatud ni Miguel si Wenna. Mipauli si Miguel sa iyang gipuy-an sa Kalunasan. Wala siya mahimutang nga naghuna-huna sa iyang kaagi gikan kaganinang udto.
Pagka-ugma, gidala gayud ni Miguel ang amigo niyang panday ug gipatan-aw kun unsaon pag-renovate ang tindahan ni Wenna, ang umaabot nga kasosyo niya sa negosyo.
Wala makatuo si Wenna nga gipatrabaho dayon ni Miguel ang tindahan. Paglabay sa duha ka semana, nabag-o na ang porma sa tindahan.
“Day-off nako karon Wen, tana mangompra ta og mga baligya. Ikaw gunit sa atong dugang puhonan o, One hundred thousand na,” matud ni Miguel. “Hala, tininuod na g’yud ning imo Migs?” nakapangutana si Wenna nga nagngisi.
Milabay ang daghang mga adlaw. Mi-click gayud ang tindahan nila ni Miguel ug Wenna kay gisundog nila ang pamaagi sa mga dagkong grocery nga ang mga customer mao ra ang mokuha sa buot nila paliton.
Usa ka hapon, gikan sa trabahoan mihapit si Miguel sa tindahan. “Giandaman gayud tika og pagkaon kay nasayud ko nga moagi ka karon dinhi,” giingnan ni Wenna si Miguel. “Kanindot gayud kun magpirmi na unta,” ni Miguel pa.
“Unsay buot mo nga ipasabot Migs?” nakapangutana si Wenna sa ulitawo. (Sumpayan)