Tambagi ko Lover Boy

Si Banong, hilomon apan kugihan nga binuhat. Usa siya ka magsisibya sa radyonga modawat og mga sulat ug motambag sa mga problema nga may kalibotan sa gugma. Iyang gigamit ang takuban nga “Lover Boy” sa iyang programa nga mabati matag ala una nga takna sa kahaponon sa Radyo Baktas.

“Sulod lang diri sa balay Noy hapit na man to mopauli si Mama,” pulong pa ni Arnel gikan sa sulod sa panimalay.

“Pasagdi lang Arnel, ari lang ko sa gawas maghulat,” tubag ni Banong nga nagpahimutang ubos sa kahoy’ng mansanitas dili layo sa panimalay. Samtang naghulat, nagkaila sila si Arnel, ang batan-ong anak ni Anita nga maoy iyang tuyo.

Usa si Anita sa mga suking tigpaminaw ni Banong sa iyang pagpanambag. “Dear Mr. Lover Boy, nakaanak ko apan nagpabiling dalaga hangtod karong panahona nga hapit na motungtung sa kwarenta ang pangedaron. Matinumanon ko sa akong gusto kaniadto samtang nagtungha pa. Nakasab-an ko sa akong mga ginikanan busa gikan sa tunghaan, nisulod ko og imnanan ug naghubog. Napaangkan ko sa lalaki nga akong nailaila didto. Sulod sa daghang katuigan nagsige ko og pangita sa maong binuhat nga nagpahimulos kanako kay naa siyay gikuha gikan kanako nga kanunay’ng magpahinumdom nako ngadto kaniya. Unsay akong buhaton? Palihug tambagi ko. Anita.” Inay tubagon ang sulat, gihipos kini ni Banong. Giampingan.

“Maayong gabii, paagia ko ha,” pulong sa babaye nga nagkapuliki og dala sa iyang mga kinumpra. “Ay sori, nakababag ko sa agianan Ma’am,” tubag ni Banong dayong hatag og luna agianan sa babaye. Bigot ang babaye bisan may pangedaron na. Mikalit og kuba ang dughan ni Banong. Nibukot kaniya ang dili mahubit sa pulong nga kabalisa. Malipay ba siya? Maguol? Wala damha, nakapanihapon si Banong sulod sa panimalay human gipailaila ni Arnel si Banong sa iyang inahan nga si Anita. “Salamat kaayo Lover Boy nga nagkaila ta. Ikaw baya ang paborito nakong magtatambag. Kumusta na ka? Taudtaud na nga wala ko makadungog nimo sa imong programa sa radyo. Gimingaw lang pud ko nimo,” ni Anita pa.

“Anita, akong iuli kining butang nga akong nakuha gikan nimo,” dayong tunol ni Banong ngadto ni Anita sa ID nga gikuot niya gikan sa iyang bulsa. “Oi, ang akong ID nga dugay nang nawala,” nahingangha si Anita sa nakita. “Lover Boy, este Banong, diin man kini nimo napuniti?” sukna ni Anita. “Wala na nako mapuniti. Ako nang nadala kaniadto human ta magkakuyog gikan sa imnanan sa dalan Sanciangko mga napulo ug lima ka tuig na ang milabay. Pasayloa ko Anita please...” wala kapugngi ni Banong ang pagpanglugmaw sa iyang mga luha.

“Banong, buot mong ipasabot ikaw to ang binuhat nga gikakuyog nako kaniadto? Maayo kaayo ka motambag sa imong mga magtatampo sa kahanginan. Ug naikag ko kanimo tungod kay nagdala ka sa takuban nga Lover Boy. Mao kini ang imong gipaila kanakong pangalan kaniadto sa dihang imo kong giduol sa imnanan sa Sanciangko. Apan dala pud lagi sa imong pagkagwapohon, wala nalang ko manumbaling pa og pangutana sa imong tinuod nga pangalan,” gitutukan ni Anita si Banong. Lutaw gihapon kaayo ang kahitsuraan niini. “Oo, ako kini Anita,” niduko na lamang si Banong. “Sige nituo nako nimo. Ilailaha si Arnel ang atong anak.” Nilingi siya ni Arnel, “Anak, siya si Banong ang imong amahan. Gipatuo tika nga patay na siya apan dako diay siyang buhi,” mapasigarbohong pahibalo ni Anita. “Pa, salamat kaayo nga gikaila ko ikaw,” nigakos si Arnel ni Banong, dayag kaayong mabati ang iyang bakho sa kalipay.

Sa unang higayon, nibathay sa panagway ni Banong ang pagmaya. Wala niya mabantayi nga nigakos na kaniya si Anita. “Karon nga kompleto na ta, palihug tambagi ko Lover Boy kun unsay sunod natong buhaton,” mainiton kaayo ang pulong ni Anita ngadto ni Banong. Mikuyamang sa kasingkasing ni Banong ang iyang pagkamahigugmaon. (Katapusan)