Gabuk nga bag - Gula 4

Nalingaw pag-ayo si Miguel sa pakig-estorya kang Wenna. Nalimot na lang gani siya nga hapit na diay alas dos sa hapon ug wala na siya maka-report sa iyang opisina. Giteksan na lang ni Miguel ang ilang HR head ug nananghid nga dili maka-duty.

“Naamong na hinuon ang imong trabaho da tungod nako Migs. Sori ha? Basin og mahimo ka pa nga maka-duty karon?” giingnan ni Wenna si Miguel. Apan nahukman na ni Miguel nga dili na lang siya motrabaho.

Giubanan ni Miguel si Wenna dihang miadto kini sa iyang tindahan. Gipulihan ni Wenna ang iyang manghod nga maoy nagbantay sa tindahan dihang nangompra siya og dugang baligya sa Colon kaganina.

“Kusug-kusog man diay ang halin sa imong tindahan Wen, apan kuwang pa lang sa stock,” giingnan ni Miguel ang dalaga. “Mao lagi, unsaon kuwang sa puhonan Migs,” dali nga tubag ni Wenna.

May nahuna-hunaan si Miguel. “Gusto ka ba nga magsosyo na lang ta niining imong tindahan, mohatag ko og dugang usa ka gatus ka libo ka pesos ug ipa-renovate nako ang tindahan para mo-attractive sa mga costumers,” ni Miguel pa.

Naghinuktok makadiyot si Wenna. “Maayo ‘sab ang imong sugyot Migs apan maayo kay mosalig ka pagpagamit sa imong kuwarta nako nga bag-o pa man kita nga nagkaila,” matud ni Wenna.

Mipahiyom si Miguel ug gipikpik ang abaga sa dalaga. “Sige, ugma dayon, ipatan-aw nako sa akong kaila nga panday kining tindahan aron makahatag siya og lista sa mga palitonon alang sa renovation.”

Tibuok hapon nga didto ra si Miguel nakig-uban ni Wenna sa tindahan. Nagdungan sila pag-snack pagka-alas kuwatro sa hapon. Nahimong suod na kaayo silang duha bisan sa kabag-o pa nga sila nagkaila.

“Dapiton ko ikaw og dinner sa gawas Wen,” giingnan ni Miguel ang dalaga. “Sige, ganahan kaayo ko ana Migs,” giteksan ni Wenna ang iyang manghod aron maoy mopuli kaniya sa pagbantay sa tindahan.

Wala danti og dugay, nanglakaw sila si Miguel ug Wenna luwan sa motorsiklo sa ulitawo. Daw susama na sila og managhinigugmaay kay suod na kaayo silang duha. Moagbay na gani si Miguel kang Wenna pagsulod nila sa usa ka kan-anan sa uptown.

“Kanindot kun ikaw pa unta ang akong nahimong girlfriend kaniadto Wen no? Buotan ka man kaayo,” palabtik-estorya ni Miguel ngadto sa dalaga. (Sumpayan)