Gabuk nga bag

Wala abti’g 15 minutos gikan sa pagbiya nila ni Miguel ug Wenna sa downtown area, nahiabot sila sa Echavez Street eskena Lorega. “Sulod anang gamay’ng agianan kay masulod man ang motor para makatultol ka sa among balay,” giingnan ni Wenna ang bag-ong higala.

Didto sila mitangka sa usa ka gamay’ng kapilya. Giparking ni Miguel ang iyang motorsiklo kilid sa kapilya diin daghang mga bata nga nagduwa. Usa ka bata ang misugat ni Wenna ug miparayeg.

Gibitbit ni Miguel ang bag nga diha niya gibutang sa atubangan nga bahin sa motor. Misunod siya ni Wenna nga mipaingon sa usa ka balay nga nahimutang kilid sa sapa.

“Dali dayon Migs. Mao tawon ni ang pinobre namo nga balay,” giingnan ni Wenna si Miguel dihang mitangka na sila sa pultahan. Takulahaw lang nga misulod kadtong bata nga mora’g tres-anyos nga misugat kang Wenna didto sa kapilya.

“Paghinay Dong, kay naa si Tito Miguel nimo. Anak diay nako siya Migs,” matud ni Wenna. Daw natuk-an si Miguel nga nakadungog sa gisulti ni Wenna. Mora’g kaatrason si Miguel kay basin og masuko kaniya ang bana ni Wenna.

Nakabantay si Wenna nga nahauknol si Miguel pagkadungog sa iyang gisulti. “Uy, nadugay ka man lagi pagpangompra Wenna,” matud sa usa ka hamtong-babaye nga misugat sa sala. Paniid ni Miguel ang babaye inahan ni Wenna.

“Disgrasyaha Ma, naputol bitaw ang gawong sa plastik bag nga akong gibitbit nangayabo sa karsada ang akong mga pinalit. Siya si Miguel maoy mitabang nako pagpamunit ug mihatag nako og laing bag,” giingnan ni Wenna ang inahan.

“Maayong hapon Nang,” matud ni Miguel. Igo lang mipahiyom ang inahan ni Wenna ug midawat sa pinalit nga gibitbit ni Miguel. “Lingkod Migs,” matud ni Wenna.

Bana-bana ni Miguel basi sa sitwasyon sa panimalay nila ni Wenna nga wala sila magkalisud-lisud sa pagpuyo. Gisud-ong ni Miguel ang mga hulagway nga diha sa kwadro.

Diha pa masuta ni Miguel nga nahimo na diay nga “muse” si Wenna dihang nagtungha pa kini sa University of the Visayas (UV). Migawas si Wenna gikan sa iyang kwarto nga nagsul-ob gihapon og short pants apan lahi na ang T-shirt nga iyang gisul-ob. Mas misamot ang iyang kaanyag ning higayona. Dayon nakita ni Miguel nga nakahuman diay si Wenna sa kurso pagka-maestra. “Wala pa ko maka-board kay unsaon nga mimabdos man, walay swerte. Single mother diay ko Migs,” matud ni Wenna. (Sumpayan)