Gabuk nga bag

Gikan si Miguel nga mikaon sa suki niya nga kan-anan diha sa Manalili. Paggawas niya aron mopaingon sa iyang gitrabahoan, nakita niya ang usa ka dalaga nga nagsul-ob lang og short pants nga nagpaingon sa iyang nahimutangan.

Nagbitbit kini og duha ka bag nga adunay sulod nga mga pinalit sa unahan nga department store. Pagsaylo sa maong babaye sa nahimutangan ni Miguel, nahukman niya nga iya kining sundon.

Samtang naglakaw si Miguel, didto ra sa paa sa maong babaye napunting ang iyang panan-aw. Puti ug nindot kaayo’g porma ang paa sa maong babaye mao nga wala gayud kini buwagi sa mga mata ni Miguel. Apan pag-abut niini sa dapit sa eskena, aksidente nga naputol ang plastic nga gunitanan sa bag. Nahulog ang bag ug nagkatag ang mga pinalit sa maong babaye ngadto sa karsada.

Misantup dayon sa huna-huna ni Miguel nga tabangan pagpamunit ang babaye. “Nipis man gud kaayo kining plastik bag nga ilang gigamit,” giingnan ni Miguel ang babaye. “Ulawa ani uy,” matud sa babaye.

Nakahinumdom si Miguel nga aduna siya’y plastik bag nga lig-on ug tua sa iyang motor. “Huwata ko kadiyot kay kuhaon nako ang plastik bag sa akong motor, tua sa atbang gi-parking,” giingnan ni Miguel ang babaye.

Nabalik dayon si Miguel ug siya ang nanulod sa mga pinalit ngadto sa iyang plastik bag. “Oki na, lig-on kaayo na nga plastik bag. Yuna, ako diay si Miguel, anaa ko magtrabaho anang maong opisina diha,” gitudlo ni Miguel ang iyang gitrabahoan.

“Salamat kaayo Migs ha? Wenna diay ang akong ngalan,” matud sa babaye nga mitutok kang Miguel. Mitukar dayon ang kaabtik ni Miguel sa mga chicks.

“Asa ka diay paingon kay ihatud na lang tika sa akong motor, kay duha ra ba na ka bag ang imong dala,” ni Miguel pa. Gibitbit ni Miguel ang usa ka plastik bag nga puno sa pinalit ug nanabok sila sa karsada.

Giguyod dayon ni Miguel ang iyang motor og gipahimutang sa atubangan ang usa ka bag. “Tana, sakay na sa motor kay ihatud tika Wen.” Wala na makabalibad si Wenna. “Echavez ra ang amo unahan sa eskena Lorega.”

Sa dayong padagan ni Miguel sa motor, milingi siya sa luyo ug nasiklapan niya ang puti ug hamis kaayong paa ni Wenna nga daw milumbay sa dapit sa iyang samput. Lalim kaayo ang iyang gibati niining sulagma nila nga panaghigala ni Wenna. (Sumpayan)