Shocking kaayo

Dear Tita Salie,

Have a nice day and I hope that you are alright. Just call me Lorin Camero, 17 years of age.

I have a boyfriend, Tita. Six months na ang among relationship. Bisan sa akong pangidaron naka-experience na gyod ko nga magmahal sa tinuoray. And I think love pud kaayo ko sa akong boyfriend. Sweet kaayo siya kanako ug permi lang ko niya i-surprised. Sometimes, tagaan ko niya og flowers, usahay pud chocolate. Unya kundili mi magkita manawag gyod siya nako sa celfon. Apan karon bag-ohay lang magkita mi sa akong cousin. Syempre, taud-taod na kami nga wala nagkita so nagkumustahan kami mahitungod sa among life, and of course wala gyod mi magbulag o maghuman sa among estorya kun wala namo mahisgoti ang kabahin sa among lovelife.

Niuna pagsulti ang akong cousin sa iyang lovelife. Ug shocking kaayo ang iyang gisulti kay matud niya nagka-uyab sila sa lalaki nga akong uyab ug bag-ohay lang kuno. Wala na ko makatingog human niya og share. Ako lang siyang gisultihan nga wala pa koy gisugot. Wala nako pahibaw-a nga uyab usab nako ang bag-ohay niyang uyab.

Mao kini ang akong gikalibgan karon, Tita. Dihang akong gipapili ang akong uyab, matud niya nga maglisod siya pagpili. Tinud-anay kaha ang iya diri nako, Tita? Palihog pasabta ko. Thank you and more power.

-- Lorin

* * *

Dear Lorin.

Sa ingon niana nga sitwasyon, dili na kinahanglan nga siya ang mamili kaninyong duha sa imong ig-agaw. Sino siya? Kay kun ingon niana ang kanunay nga buhaton kanatong mga babaye sa ingon nianang klase sa lalaki, dili mawagtang ang mga abusado ug oportyonista nga mga lalaki. Kanunay lang sila nga magsalig kay ato lang na man silang papilion sa panahon nga atong masakpan ang ilang pagkamalimbongon.

Ang maayo nimong buhaton mao nga ikaw ang mamili ug dili ang imong boyfriend. Mamili ka kung mosugot ka ba nga padayon ka niyang limbongan kay wala siya’y baroganan, o imo siyang buwagan. Ang ingon niya nga pagkatawo ang dili angay nimo hatagan og importansya kay wala siya’y respeto kanimo.

Tan-awa ang iyang gibuhat nga bisan imong ig-agaw iya pang gipanguyaban. Kun duna siya’y respeto kanimo, puyde siya manguyab og lain apan dili lang unta sa imong ig-agaw. Nagpaila lang kini kun unsa kagamay ang iyang pagtan-aw kanimo. Nagpaila lamang kini nga wala siya mahigugma kanimo sa tinuoray. Busa kun ako’y ikaw, ako na siyang gibulagan kay siya ang lalaki nga walay baroganan.

-- Tita Salie