Habal habal

Gula 7

Nakasabot si Efren kun unsay tumong ni Leng nga mahitabo kanila. Naghinam-hinam na si Efren sa sunod nga panghitabo mao nga wala siya’y tingog-tingog nga mipaturatoy pagpadagan sa motor.

Nakahinumdom si Efren nga adunay payag-payag nga daplin sa karsada nga walay tawo panahon sa gabii. Nakahuna-huna si Efren nga adto niya didto paraygan og maayo si Leng.

Tuod gihunong ni Efren ang motor atubangan sa payag. Nanaug si Leng ug gitagoan ni Efren ang motorsiklo sa luyo sa payag aron dili makadapit og pagtagad sa mga mangagi.

Migunit sa bukton ni Efren ang Koreana. “Keep quiet,” gihunghongan ni Efren si Leng. Nanglingkod sila sa lantay nga kawayan. Ngitngit ang palibot ug wala nay mga sakyanan nga nangagi.

Wala maglangan og higayon si Efren, giparaygan niya si Leng. Misukol og pakigparayganay ang Koreana. Wala sila’y tingog-tingog ug madungog gani nila ang ilang nag-asud-asod nga gininhawa.

Nasayran ni Efren nga dili na siya maoy nakauna kang Leng apan wala kini niya igsapayan. Daw gisuwerte gayud siya sa iyang sideline isip drayber sa habal-habal kay duha ka babaye ang iyang nakubit. Human sa makutas nila nga kumbati ibabaw sa lantay’ng kawayan, nag-iyahay sila pagsul-ob sa ilang mga sapot. Apan wala pa gani makahuman og sul-ob si Efren sa iyang karsones, mitingog ang call alert sa iyang selpon.

Dali nga gikuha ni Efren ang selpon sa iyang case aron dili makamugna og dugang kasaba ang pagtingog sa ringtone. Nakita niya nga si Lyn ang nanawag. Wala siya masayod unsay tukma nga buhaton kay anaa si Leng sa iyang tupad.

Samtang dili tuod makasabot si Leng kun magsultihanay sila si Lyn sa selpon, apan nabalaka siya nga motingog unya kini og masayran ni Lyn nga may kauban siya nga babaye niining taknaa sa kagabhion.

Giputol ni Efren ang ilang koneksyon ni Lyn. Gibutang niya sa silent mode ang iyang selpon ug gipasagdan lang nga nagsigi og kontak si Lyn.

Gihatud ni Efren si Leng sa iyang apartment duol sa gate sa Camp Lapulapu. “Bye, Good night,” giingnan ni Efren ang Koreana ug misirit pagpadagan. Didto siya mihunong atubangan sa JY.

“Gidala baya sa ospital kadtong call center agent nga imong suki kay mopauli na unta sakay sa motor ni Doming apan nabanggaan diha sa unahan,” Gikontak ni Efren ang selpon ni Lyn apan dili na makontak. 

Taud-taud midangoyngoy si Efren kay nasayran niya nga patay na si Lyn uban sa habal-habal drayber nga si Doming. (Kataposan)