Duha ka dagway sa usa ka tawo

Gula 1

Ang bayhon sa usa ka lalaki.

Kini ang unang mitimbaya sa panan-aw ni Claire sa iyang pagsulod sa lawak 143 sa usa ka motel. Naghigda kini sa kama samtang nagtan-aw sa x-rated nga salida sa telebisyon. Misantop dayon sa iyang hunahuna nga mao kini ang iyang kustomer nga giingon sa iyang bugaw nga naghulat kaniya sa Paraiso Motel. Mao na gyud kini.

Mibangon ang lalaki pagkamatikod niini sa iyang pagsulod. Gipahinayan niini ang telebisyon pinaagi sa remote control nga gigunitan niini. Milingkod kini sa ngilit sa kama. Sulagma nga nagkatagbo ang direksyon sa ilang mga tinan-awan.

Sa unang higayon iyang namatikdan nga ambongan ang lalaki. Nasihag niya ang kaaghop nga mihulma sa panagway niini. Apan dihang milahutay ang ilang pagtinutokay, iyang nakita ang kasipat nga mihun-ag sa nawong sa lalaki. Mora kini’g doble kara. Ang pikas niining nawong buotan samtang ang lain niining nawong bilyako. -- Sumpayan pa