Gula 146
Gisugdan dayon nila ang operation. Lainlain og kalibre ang mga armas nga ilang dala. Silang tanan nagbangan og puting panyo sa ilang mga ulo. Si Rey milain og dalan sa iyang mga sakop.
Si Salie (didto sa lawak nga nahimutangan nilang Allan), wala mohunong sa pagmakiluoy kang Allan. Apan ang lalaki igo lamang mikatawa. Nagpanilap kini samtang nagsud-ong sa kinatibuk-an sa dalaga. Miduol kini kaniya ug gigakos siya. Milugnotlugnot si Salie dihang gihagkan niini ang iyang liog ug dughan. Apan wala siya’y nahimo kay gigapos ang iyang mga kamot. Kutob na lang siya sa pagsinggit.
Nakadungog si Yuri sa singgit ni Salie. Nagdali ang ulitawo -- nga nabalisa pag-ayo pag-adto sa dapit diin naggikan ang tingog sa iyang hinigugma. Misunod kaniya ang duha niya ka sakop. Ug ila gayong natultolan ang balay nga nahimutangan nilang Salie ug Allan.
“Ako ka lang, Salie! Ako ka lang! Ha-ha-ha!” Ingon sa hingpit na gayod nga nawad-an sa maayong pangisip si Allan. Gigisigisi niini ang sapot ni Salie.
“Tabanggg!” hinurot ang tingog nga misiyagit si Salie.
Wala na makaantos si Yuri nga nagpamati sa tingog sa iyang hinigugma nga daw nalisang na pag-ayo. Dihadiha gipukpok niya ang palid sa pultahan.
“Salie! Si Yuri kini!”
Ingon sa nabuhi pagkalit ang paglaom sa dalaga “Yuri, tabangi ako! Luwasa ako!”
Miliraw ang mga mata ni Allan. Mikagot ang iyang mga ngipon. Wala siya magdahom nga mahiabot si Chief Inspector Yuri Cuyos. Kalit niyang gihulbot ang pistola nga gisuksok sa iyang hawakan. -- Sumpayan pa