Gidungog sa balaang bata ang pangaliya ni Paeng

Mr. Reyes, ania lagi ming managtiayon ning sayong kabuntagon gumikan sa usa ka tuyo nga importante kaayo. Hinaut unta nga dili mo kami pakyason,” pamahayag ni Paeng uban sa iyang asawa nga si Kikay.

“Bitaw, mao gyud ning butanga ang naghasol namong managtiayon karong panahona,” dason ni Kikay.

“Bi, sultihi ko ninyo para mahibaw-an nato,” tubag ni Mr. Reyes nga mihigop sa iyang kape.

“Naka notisya seguro ka nga napriso karon ang among anak nga si Bobong ug daku-daku gyung kantidad ang gisitar sa korte alang sa iyang piyansa,” sulti ni Paeng samtang nagdungka og sigarilyo.

“Gumikan niini, nakahukom ming magtiayon nga iprenda namo ang among yuta diha kanimo sa kantidad nga usa ka gatus ka libo ka pesos, kun uyon ka,” dason pa ni Kikay.

“Ah, katong yuta ninyo nga kalubihan ug kamaisan,” pangutana ni Mr. Reyes.

Si Mr. Reyes usa ka retiradong U.S. Navy ug pensiyonado na karon. Siya ang dangpanan sa mga silingan ug mga kaila nga naproblema sa kwarta. Duha na ka tuig siyang nabiyudo. Usa ra ang ilang anak nga usa na ka nars nga karon tua magtrabaho sa Amerika.

“Lima ka tuig ang atong tagal ini. Sulod ning panahona, ako ang magpahimulos sa mga abot sa mga lubi, mais, lagutmon ug uban pa. Balika ninyo ang tseke sa prenda ugmang adlawa sa ingon ining orasa,” nagkanayon si Mr. Reyes.

Namauli silang managtiayon. Naprenda tuod ang ilang yuta ngadto kang Mr. Reyes apan naguol sila kay wala na may uma sila nga sarang kapanginabuhian.

Pilay estorya, miligid ang panahon.” Kadali ra sa panahon Paeng. Kilab lang ang unom ka bulan sukad sa pagkaprenda sa atong yuta,” nagkanayon si Kikay usa ka higayon niana samtang nanihapon sila uban sa ilang bugtong anak nga si Bobong nga usa ka piyansado.

“Bitaw, pait ug lisod ang kahimtang nato karon kay magpalit naman kita og pagkaon ug sa uban pang butang ning kalibotan,” sumpay ni Paeng.

“Ang maayo ini, nag-angat man gyud ang kapistahan ni Senyor Santo Niño, moadto ta sa Basilica ug magsinulog ta, ug hangyoon nato Siya nga patikaron kita ni Mr. Reyes sa atong yutang naprenda ug hangyoon usab nato ang Balaang Bata nga mabahinan kita sa mga abot sa yuta,” sugyot ni Kikay.

Hugot ang ilang pag-ampo ug nagsinulog sila. Usa ka higayon niana, bag-ohay pa lang sila nga nakapamahaw, nakurat sila kay mihapit gyud og tuyo ni Mr. Reyes sa ilang panimalay.

“Maayong buntag kaninyo, Paeng ug Kikay. Mihapit ko sa inyo kay gusto ko nga kamo lang una ang motikad ug moatiman sa inyong yuta. Tunga kita sa abot kun produkto. Ok ba kini sa inyo?”

“Aw oo, uyon kaayo mi ini Mr. Reyes,” hapit nagkadungan ang managtiayon sa ilang tubag.

Sa nakalakaw na si Mr. Reyes, nakaingon si Kikay, “tan-awa Paeng, milagroso gyud ang Senyor Santo Niño. Wala lang nato damha karong adlawa ang maayong balita.”

Dugay na kaayo ang Senyor Santo Niño. Panahon pa Siya sa mga Katsila ug hangtud karong panahona giyukbo ug giampo-an Siya sa atong mga katawhan. (Kataposan)