Mata sa Kasingkasing

Gula 146

Sa misunod nga mga adlaw, nakamatikod si Angeline nga wala na mosulod si Almina sa school campus. Wala na kini motambong sa klase. Wala’y nasayod kun unsa nay nahitabo kaniya.

Apan misantop sa hunahuna ni Angeline nga nahinayon gayod tingali ang pagmabdos ni Almina ug dako na ang tiyan niini maong napugos kini paghunong sa pagtuon. Basin maulaw na kining makita sa ubang mga estudyante nga nagbusyad na ang tiyan, labi na nga mora’g wala gayo’y interes si Erik sa pagpakasal niini. O ba kaha, ang mga ginikanan ni Almina maoy nagbuot nga mohunong na kini sa pag-eskuyla.

Tulin nga nanglabay ang mga adlaw. Miabot ang final exam nila ni Angeline dayong tak-op sa second semester.

Pagkatapos sa second semester, si Angeline mipauli sa ilang lungsod sa Danao. Nalipay siya nga gikauban na sab niya ang iyang mga ginikanan ug igsuon. Nabatyagan niya ang kanindot sa bonding sa pamilya.

Sa pagbakasyon ni Angeline sa Danao, nakabaton siya’g talagsaong peace of mind. Nasinati niya ang karelaks sa hunahuna. Wala’y kabalaka. Wala’y kahasol. Ug dili na makasamok si Erik kaniya. -- Sumpayan pa