Soul mate

Buntag sayo sulod sa akong bupete sa Mandaue, duna ko’y gidalian og trabaho sa kumpiyuter. Deadline karong adlawa sa pagsumiter ining dokumentoha sa Court of Appeals.

Takulahaw lang may nanoktok sa pultahan sa opisina. Niandar akong sapot kay alas sayis pa gani, duna nay kliyenteng nisayo.

Giablihan nako ang pultahan. Maoy nisugat sa akong panan-aw ang akong manghud nga si Roger ug iyang asawa nga si Sandra. Kabundakon ko’s pultahan. Wa gyud ko magdahum nga sila moduol nako. Dugay na ming wa nagkita kay dili maayo ang among relasyon.

“Balik lang mo karong alas singko sa hapon!” nako pa. Pinabundak.

Si Roger akong ikaupat nga manghod. Napulo mi tanang mga anak ni Papa Dencio ug Mama Nena. Wa pa may family planning kaniadto. Among kamaguwangan si Maria. Tua’s Kansas, USA nagpuyo uban sa iyang bana nga si Albert, Amerkano. Ako ang ikaduha, naabogado sa kaugalingong paningkamot. Sunod nako si Verna nga dalagang guwang.

Sunod niya si Eddie nga usa ka sekyu sa Kapitolyo. Sunod ni Eddie si Danny, naminyo og anak sa mayor sa Alcoy ug tua na namuyo didto. Sunod si Danny si Roger.

Siya ang pinalabing anak. Pinatuyangan siya’s gusto. Kun mangilog sa duwaan sa mga igsoon, ang giilogan maoy badlongon aron way samok. Nagtuo siyang ang tanang tawo utangan ug may obligasyon niya. Kay matud pa ni papa, “Guwapo si Roger. Liwat nako”.

May manghod pa siyang upat ka lalaki. Si Domy ug Demy, kaluha. Ulitawo pa. Ipon nilang mama Nena sa Matutinaw. Sunod nila si Dindo. Minyo na ug nagdrayeb ug tourist bus. Ang kamanghuran si Dante. Minyo na sab. Gitabangan ni Maria. Gipundaran og negosyo sa Mandag-um. Biyuda na si mama. usa ka tuig gikan pagretiro ni papa sa Kapitolyo, namatay sa komplikasyon sa dayabites. Ang nakapahimulos sa retirement ni papa, way lain kun di si Roger. Gipalitan siya’g motorsiklo ug esteryo. Mora’g siya ray anak.

Sa gagmay pa mi, didto mi puyo sa baryo Kintolimbo ning dakbayan. Dunay dos andanas nga balay nga napalit si papa didto. Pareho mi tanang gigastohan ni papa sa pagtungha. Si mama maestra ug dunay tindahan. Niabag siyang papa sa kadaghan namong mga anak buhionon. Ako nakahuman og Nautical apan wa nanakay og barko. Busa nanarbaho lang ko ug nikuha’g laing kurso. Gikaluy-an sa Diyos, naabogado. Si Roger, tulo ka kurso ang gikuha. Apan way gihuman. Neentra pag adis-adis. Hapit na praning.

Pagkaabogado nako, siya akong mensahero. Kawatan kaayo. Di mangulig sukli kun may ipapalit. Tamperon ang resibo aron makaganansiya. Sa silong sa among opisina, may credit line mi sa copier. Kun dunay kliyente magpaseroks unya mobayad, ibulsa niya ang bayad. Unya utangon didto sa copeir. Bright kaayo sa pangawat. Sa dihang wa na ko kaagwanta, gipotbol nako. Gipabayad pa ko og P20,000. Aron way gubot, nibayad ko.

Pagkamatay ni papa, siya ang nibanos sa balay namo sa Kintolimbo. Iyang gikwarto-kwarto. Gilungkab niya ang mga lawak ni Domy, Demy, Dante ug Dindo. Nangawala ilang mga alahas ug mga bililhong gamit. Iyang gipaabangan ug mga lodgers ang mga lawak.

Siya ang nagkolekta sa abang. Iya ra. Apan kun may bayranan sa kuryente, tubig ug telepono, adtong mama mangayo. Way sama kadawo ug kabintahoso!

Nibalik gyud sila pagka alas singko sa hapon.

“Kuan lagi Dong Charlie. Si Sandra dunay kaso sa labor. Gipotbol siya’s iyang amo bisa’g way sala, ni Roger.

“Bueno, nasayud ko’s kinaiya sa imong asawa. Adis-adis ug kawatan, pareho nimo. Soul mate mo. Mao nang nagkasabot mo. Proybaha una kun angay ba mong tabangan nako,” nako pa.

“Di diay ka motabang sa imong igsoon?” ni Roger. Nagminghoy.

“Maigsoon ka’g sa dili. Ug angay kang tabangan, motabang ko,” nako pa.

“Unsa may gusto nimong buhaton nako?” ni Roger. Nagping-it.

“Inig balik nimo ugma, dad-i ko’g sulat. Ang unod sa sulat, nakaamgo ka na’s imong mga sala. Nangayo ka’g pasaylo. Nanaad di na mousab,” nako pa.

Nitindog ang managtiayon. Nitalikod nga way panamilit. (Kataposan)