Mata sa Kasingkasing

Gula 143

“Husto na, Erik! Ayaw na dugangi ang kabug-at sa akong kasingkasing. Ayaw ko patuoha nga mahigugma ka sa sama nako!”

Ug gibiyaan ni Angeline si Erik didto sa sala. Misirit siya’g lakaw paingon sa sulod sa iyang lawak. Mihigda siya. Unya mihilak. Mibakho pag-ayo. Alang niya dakong insulto sa iyang pagka-babaye ang gihimo ni Erik. Nakamenos kini kaniya!

Pagkaugma, sulod sa school campus, nangita’g higayon si Erik nga magkasulti sila si Angeline. Apan gilikayan ni Angeline ang ulitawo. Nahiubos siya sa gibuhat ni Erik kaniya.

Pagkagabii, namisita na sab si Erik kang Angeline.

Wala mogawas si Angeline sa iyang lawak. Wala siya’y ganang makigsulti kang Erik. Wala siya’y planong makig-atubang sa ulitawo.

“Ingna siya, Day, nga natulog na ko,” giingnan ni Angeline si Vera nga maoy mipahibalo kaniya nga nagpaabot si Erik kaniya sa sala.

“Nganong dili ka man makig-atubang niya?” Sukit ni Vera.

“Naglagot ko niya.” -- Sumpayan pa