Buotang Doktor

Gibati og dili tiaw nga kalooy si Gabriel ngadto kang Liza tungod kay nasabot niya nga wala gayud kini kwarta nga ikapalit sa giresita nga tambal alang sa iyang amahan.

Resident doctor si Gabriel sa Vicente Sotto Memorial Medical Center (VSMMC) ug siya ang nag-atiman sa amahan ni Liza nga nag-antos sa grabe nga hubak. Gawas sa tambal, giresitahan ni Gabriel og gamay’ng spray si Liza.

Nabasa ni Gabriel ang kasubo sa panagway ni Liza nga midawat sa resita. “Kinahanglan na sa Papa nimo aron nga maluag-luag og gamay ang iyang pagginhawa,” giingnan ni Gabriel ang dalaga.

Takulahaw lang nga miabot ang inahan ni Liza. “Ma, dia na sa’y resita nga gihatag ang doktor... paita ani uy, wala ra ba kita’y kwarta,” nadungog ni Gabriel ang hinay nga pagsultihanay ni Liza ug sa iyang inahan.

Gisud-ong ni Gabriel ang inahan ug anak. Nasangit ang iyang tinan-awan sa pagsud-ong sa panagway sa dalaga. “Swerte ang imong amahan kay nakaangkon siya’g anak nga maghuna-huna gayud kaniya, dili sama sa ubang anak,” matud sa doktor.

Nahuna-huna ni Gabriel nga sa tulo nila ka magsuon, siya ra usab ang mibati og kalooy ngadto sa masakiton niya nga inahan. Ang duha niya ka manghod, pareho nga wala lang magpakabana.

“Taga diin diay ang pasyente?” gipangutana ni Gabriel ang dalaga. “Sa Labangon ang amo dok,” matud ni Liza. “Aw kun mao, mahimong mangayo mo og tabang ni Congressman Tommy Osmeña o kaha sa mayor,” ni Gabriel pa.

“Tabangan ko kamo nga makapangayo’g tabang ni Tommy. Apan pagka karon, ako lang usa ang mopalit sa giresita ko nga tambal para sa imong Papa,” ni Gabriel pa nga mikuot sa iyang pitaka.

Gitunolan ni Gabriel og tibuok usa ka libo ka pesos si Liza. “Sige na, dalia pagpalit ang tambal ug ang spray para maluag-luag na ang ginhawa ni Papa nimo.”

Daw dili makatuo si Liza nga dunay doktor nga sama kang Gabriel nga mao pa ang mipalit sa tambal nga giresita alang sa pasyente nga iyang giatiman. Dali ra nga mibalik si Liza.

Giuli niya sa doktor ang sukli sa P1,000 nga kapin sa usa ka gatus. “Imo na kana, tabang nako kana kanimo kay nasayud ko nga nanginahanglan mo og tabang,” matud ni Gabriel.

Lapas sa alas sayes sa gabii, nakurat si Liza kay miadto sa ilang ward si Gabriel nga wala na magsul-ob og sapot sa doktor. “Tana, ubanan ko ikaw sa balay nilang Congressman Tommy ug Ma’am Margot.” (Sumpayan)