Gula 137
Miduko si Salie. Apan pagkilab sa pipila ka daklit mibalik siya pagyanghag ngadto sa ulitawo.
“Hain man ang imong darkroom?” nangutana siya.
“Naa diha,” gitudlo ni Allan ang usa ka closet.
Mikunot ang agtang ni Salie nga minunot pagtan-aw sa gitudlo ni Allan. Unya midali siya pagpaduol sa closet ug gibuksan kini. Dihadiha mibantang sa iyang panan-aw ang usa ka pultahan. Giabot og kalibog ug kahibulong ang dalaga kun nganong may pultahan sulod sa maong closet.
“Abiyerto kanang pultahan,” matud ni Allan. “Gusto kang mosulod?”
Wala motubag si Salie. Gitukmod niya ang palid sa pultahan ug naabli kini. Misulod siya. Gigamhan gayod siya pag-ayo sa curiosity. Nainteres siya sa mga butang nga iyang nadiskubrehan. Ug mangita pa siya’g dugang kalig-onan nga magmatuod sa iyang katahap nga si Allan mao ang misteryosong tawo.
Ngitngit ang sulod sa maong lawak. Gipangita ni Salie ang nahimutangan sa switch pinaagi sa pagpanghikap sa bungbong. Iya gayod kining nahikapan. Iyang gi-on. Pagbuhagay sa kahayag sa palibot sa lawak, dihadiha nanagko ang mga mata sa dalaga sa iyang nakita sa darkroom ni Allan.
Natugkad ni Salie nga tinuod gayod nga “dark” ang maong lawak nga iyang nasudlan. Didto nabantang sa mga mata sa dalaga ang dagtom nga bahin sa pagkatawo ni Allan. Nakita niya ang mga hulagway sa babaye nga gipalugpitan sa gikutay nga alambre. Pamilyar kaayo niya ang panagway sa maong babaye. Ang usa mao si Debbie Balatan ug ang lain mao si Vilma, ang kauban niya sa publikasyon. -- Sumpayan pa