Gahum sa Kuwarta

Gula 6

“Sige Loren, muadto na lang ko,” hinay ang tingog ni Roderick nga nananghid sa promo. Wala magtingog si Loren. Gihagkan siya ni Roderick sa wala pa kini mulakaw. Dali ra nga nakasakay si Roderick og taksi.

Misulod si Loren pagbalik sa iyang lawak sa apartment. Gihanduraw niya ang nahitabo tali kaniya ug ni Roderick. Ang tuo niya nga kamot naggunit kini sa P15,000 nga gihatag kaniya sa ulitawo samtang ang iyang mga mata gipunting niya sa selpon.

Nakasabot si Loren kun ngano nga daw naluya si Roderick. Tungod kini sa pag-ingon niya nga dili siya makigminyo niini kay aduna na siya’y boyfriend nga gikasabot niya nga maoy iyang pakaslan.

Gihandum ni Loren ang una niya nga pagkakita ni Roderick didto sa SM City kaganinang hapon. Nakahinumdom tuod siya nga bisan og nagsul-ob og sunglasses si Roderick apan pwerte kini nga nakatutok kaniya.              

Mitindog si Loren ug miduol sa salamin nga gipabarug niya sa lamesa. Gitan-aw niya ang iyang kaugalingon. Guwapa gayud tinuod si Loren ug mao man gani kini ang rason nga gikuha siya isip promo girl sa selpon.

Gihuna-huna ni Loren ang sitwasyon. Dugay na tinuod nga nagkarelasyon si Loren ug ang iyang boyfriend, apan wala pa niya ikatugyan ang iyang pagka babaye kang Fred.

Wala’y maayong trabaho si Fred ug gani bisan sa pagkuha niya gikan sa trabaho panagsa ra kaayo kini niya nga himuon, lahi sa ubang mga boyfriend sa iyang kauban nga promo nga mokuha gayud kanila matag human sa trabaho.

Nakapanglingo-lingo si Loren sa iyang gidangatan. Natugyan niya kang Roderick ang iyang kaputli. Hinuon wala usab siya magmahay kay sa P15,000 mabayran na niya ang utang sa iyang mga ginikanan.

Kaganina lang buntag siya nga gitawgan sa iyang manghud nga nagpahibalo nga dili na sila pautangon og makaon ug ubang kagamitan sa tindahan nga ilang utanganan kay miabut na og kapin sa P7,000 ang ilang utang.

Nahuna-huna ni Loren ang daghan kaayong kuwarta ni Roderick nga gisulod sa bag dihang gipakita kini kaniya sa ila pa lang panagkita kaganinang hapon. Milabay ang mga adlaw, walay kadasig si Loren sa iyang gitrabahoan.

Gibadlong na gani siya sa iyang kauban kay usahay dili na siya maka-abi-abi og customer kay ingon sa wala siya sa maayong panghuna-huna. Hangtud nga usa ka adlaw, kalit lang mitungha si Roderick sa gitrabahoan ni Loren. (Sumpayan)