Man Hater - Gula 135

Gibalik kini ni Allan ug siya nalingaw og pangukay sa mga magasin nga gihumpid sa center table. Naabtan gani siya ni Allan nga naggunit pa og usa ka magasin nga iyang nasabtan nga wala ikahimuot sa ulitawo.

Maayo gani kay nadala niya si Allan sa iyang pagligoyligoy og estorya. Ingon sa nahikalimtan na niini ang nahitabo kaganina gumikan sa lainlaing tema nga gisangkoan sa ilang panagkabildo. Daw nawala na sa hunahuna sa ulitawo ang kalagot sa iyang pagpangutingkay sa mga magasin niini.

Karon ang anino sa katahap inanay na usab nga mibutho sa hunahuna ni Salie. Mibalik sa iyang kahimungawong nga ang lalaki nga iyang kauban karon posible nga mao ang misteryosong tawo. Ug kini gusto niyang mamatud-an. Apan naningkamot siya nga dili hisabtan sa lalaki nga interesado siyang motan-aw sa ubang dapit sa balay niini tungod kay aduna siya’y buot sutaon.

“Unsa ba gyu’y atua sa maong darkroom nga ingon sa gusto ka man gayod nga ako kining tan-awon?” ni Salie nga mipakita kunohay og kawalay gana nga motan-aw sa darkroom ni Allan. Apan ang tinuod nagdako sa iyang hunahuna ang pag-adto sa maong dapit pamasin nga makakita siya’g bisan unsa didto nga makadugang sa pagtibuok sa iyang katahap mahitungod sa pagkatawo ni Allan.

“Wala baya,” matud ni Allan nga mipahiyom og hilaw. “Basin diay og gusto mo kining makita. Lahi man gud kining akong darkroom kay sa darkroom didto sa atong publikasyon.”

“Unsa may nakalahi niana?” ni Salie.

“Makita mo kini kun imong sudlon.” -- Sumpayan pa