Sa iyang kaugalingon, mituo si Salie nga kausa lang mahigugma ang tawo. Karon nahigugma na siya kang Yuri. Apan kun mapakyas man ang maong gugma, dili na gyud siya mahigugma, dili na gyud siya mahigugma pag-usab. Likayan na gyud niya sa hingpit ang mga lalaki. Magpakatigulang na lang siyang dalaga.
Wala tuyoa, nahinumdom si Salie sa nahitabo kanila ni Yuri -- ang pagtugyan niya sa iyang pagka-babaye ngadto sa lalaki. Kun simbako magbunga ang ilang gibuhat, unsay iyang buhaton?
Nakahinuktok si Salie niining bahina. Pakatawhon ba niya ang bata nga bunga sa iyang paghidakin-as ning danglog nga dalan sa kinabuhi? O ipakuha niya gikan sa iyang sabakan ang binhi nga gipugas sa maluibon niyang hinigugma bahala nag makasala siya sa Dios? Nasayod siya nga dakong sala ang paglaglag sa inosenteng kinabuhi sa usa ka bata. Apan kun pakatawhon niya ang bata, dili ba kaha kini maghatag lang kaniya’g kasakit ug mopahinumdom kanunay kaniya sa mapait niyang kasinatian sa gugma kang Yuri?
Misalom ang iyang hunahuna sa halawom nga pagpalandong mahitungod niining butanga. Unya mitunga siya nga nagpusnga. Wala siya makakaplag og tubag sa pangutana nga iyang gisukot sa iyang kaugalingon. Paaboton na lang niya nga ang panahon maoy mohatag og tukmang tubag sa tanan.
“Salie,” gisangpit siya ni Allan. “Mangadto na kita sa akong darkroom.
Naputol ang paghanduraw ni Salie. Karon mibalik sa iyang kahimungawong ang ilang plano nga pagsulod sa studio ug darkroom sa ulitawo. Wala kadto mahinayon kaganina tungod kay may nalimtan si Allan didto sa sala sa balay. -- Sumpayan pa