Gula 133
Wala makatingog si Salie Valle. Wala siya magdahom nga mosangpot sa ingon niadto ang ilang panagsulti. Dili siya buot nga hisgotan ang iyang kaugalingong kinabuhi. Maglagot siya nga maghunahuna niini. Dili siya buot nga mahinumdom sa gibuhat ni Yuri kaniya.
Kun buot sabton, managsama sila si Allan nga nabiktima sa panahon. Si Allan naglaom nga sila na gayod si Amanda. Apan sa kalit lang nagpahilayo si Amanda sa lalaki. Misulod kini sa kombento. Siya usab -- si Salie -- naglaom sa giluwatang pasalig ni Yuri hinungdan nga iyang gikatugyan ang iyang lawas ngadto niini. Apan wala kini motuman sa ilang gikasabotan. Wala kini motungha sa iyang gipuy-an aron pagpamalaye kaniya. Mao kini hinungdan nga nahiabot siya karon sa pinuy-anan ni Allan -- aron pagpahuwas sa iyang kalagot sa gibuhat ni Yuri.
Mibati siya’g kaluoy sa iyang kaugalingon samtang nagpalandong sa nahitabo kaniya. Mibati usab siya’g kaluoy kang Allan.
“Pagka-suwerte ni Yuri nga maoy nakaangkon sa imong gugma ug pagsalig, Salie,” midugang pa si Allan.
Ingon sa nasud-ipan si Salie. Wala siya magdahom nga kadto maoy masulti ni Allan sa iyang atubangan. Dili siya buot motubay sa gisulti sa ulitawo mao nga wala siya motingog.
Apan sa usa ka suok sa iyang hunahuna nakaingon siya sa hilom nga husto si Allan sa giingon niini nga suwerte si Yuri nga maoy iyang gihigugma. Matinud-anon siya ngadto sa lalaki. Sa wala pa niya sugta si Yuri, iya unang gisukot sa makadaghan ang iyang kaugalingon kun gihigugma ba gayod niya kini sa tinud-anay. Ug sa dihang iyang namatud-an nga gimahal gayod niya si Yuri, gidawat niya ang gugmang gihalad niini kaniya. -- Sumpayan pa