Mata sa Kasingkasing

 Gula 137

“Nahinumdom ka nga gisultihan ko ikaw nga adunay labing dakong desisyon nga angay kong himuon sa akong kinabuhi?”

“O-oo. Ngano man diay?”

“Nahinumdom ka usab nga dihay higayon nga gusto ka untang makigbuwag nako apan wa ko mosugot?”

“N-nahinumdom ko. Pero di na ko gustong maghisgot kita niadto.”

“Nakahukom na ko karon, Angeline.”

“Sa unsa?”

“Mosugot na kong magbuwag ta. Ihatag ko na kanimo ang imong kagawasan!”

Nakugang si Angeline sa gisulti ni Robert. Wala siya magdahom nga mao kini mamahimong linugdangan sa ilang panagkita karon.

Nawala na man unta sa iyang hunahuna ang laraw sa pagpakigbulag ni Robert. Gidoble na niya ang iyang paningkamot nga makakat-on sa paghigugma sa ulitawo sa tuyo nga mo-prosper ang ilang relasyon.

Unya karon si Robert na mismo ang mihagad pagpakigbulag kaniya. Aron ihatag na kaniya ang iyang kagawasan! Mora’g nakasabot na tingali si Robert nga wala gayod siya mahigugma niini. Nga ang iyang pagpakigrelasyon niini gimaskarahan sa kataphaw ug pagpakaaron-ingnon. -- Sumpayan pa