Wala molaum

Kapin sa tulo ka tuig nga nawala si Jackson sa among dapit. Mibiya siya sa among baryo nga wala mananghid kanako. Wala na usab ako makabalita bahin kaniya. Apan karon nga inanay na akong nakat-on sa paghigugma kang Edwardo ug nahikalimot na ako kaniya, kalit lang usab nga mibalik si Jackson sa among dapit. Niining iyang pagbalik, nagmapugsanon siya nga magminyo na kami.

“Dili ako motuo nga gihigugma mo si Edwardo,” matud ni Jackson. “Gihimo mo lang siyang tambal sa imong mga kamingaw dihang nahilayo ako kanimo.”

“Sobra ka ra kaayong belib sa imong kaugalingon, Jackson,” misulinga ako. “Maayong masayod ka nga makamao akong mahikalimot sa lalaki nga iresponsable nga sama kanimo. Nibiya ka sa atong dapit nga wala gani magpahibalo kanako. Kun gihatagan mo pag bili ang atong gugma, mosulti ka unta kanako kun asa ka molampanong.”

“Angkonon ko nga sayop ang akong gibuhat, Isabella. Apan mahimo ba nga hatagan mo ako’g higayon nga kahulipan ang dako kong pagkuwang nganha kanimo?”

“Gikasubo ko, Jackson. May lain nang tag-iya ang akong kasingkasing.”

“Mao kanay dili mahimo, Isabella. Ako ka lang. Dili ko mohunong sa paghangyo hangtud mosugot ka nga magpakasal ta.”

Sa hilom mibati ako og kabalaka nga iyang tinud-on ang iyang gibahad.

Buotan si Edwardo kanako. Siya ang nahimo kong dalangpan sa akong mga kaguol niadtong higayon nga mibiya si Jackson kanako. Gidawat nako ang gugma ni Edwardo dihang nangulitawo siya kanako. Ug dili na ako makatalikod sa among mga panumpa.

Gituman gayod ni Jackson ang iyang gibahad. Nagpunay siya’g samok kanako, nagsige’g hangyo nga magpakasal na kami.

Tungod sa makanunayon nga pagsamok ni Jackson kanako, gihagad ko si Edwardo nga magpaasal na kami. Nakugang gani si Edwardo sa akong hukom. Apan dugay na diay usab siyang naghulat sa hustong higayon sa paghagad kanako nga magminyo mao nga nagkasinabot dayon kami.

Tuod man, gikasal gayod kami si Edwardo. Mibati ko’g kabalaka kay mitambong si Jackson sa among kasal. Ingon sa naibtan ako’g tunok dihang natapos ang seremonyas sa kasal nga wala maghimo og kasamok si Jackson.

Sa unang gabii human sa kasal namo ni Edwardo, malipayon akong mitahan ngadto kaniya sa giampingan kong kaputli sa pagka babaye.

Paglabay sa usa ka semana, wala ako makalikay sa pagpakigsulti kang Jackson. Giatngan ko niya sa akong pagpanglaba sa tubod.

“Wa ko magdahom nga imo kining mabuhat kanako, Isabella,” ni Jackson pa.

“Kay ngano?” matud ko. “Nagtuo ka nga ikaw ray makamao?”

“Karon pa nako masuta nga dili diay tinud-anay ang imong paghigugma kanako tungod kay giguba mo man ang atong relasyon sa dakong kasayon.”

“Ikaw ang unang miguba sa atong relasyon. Mipahilayo ka kanako sa dugay’ng panahon. Sulod sa kapin sa tulo ka tuig wala ako’y nadawat bisan usa nalang unta ka sulat gikan kanimo. Dili ko buang nga molaom sa walay kasegurohan, Jackson?”

Wala motubag si Jackson.

Nahaduko siya sa akong atubangan.

“Giusikan mo ang akong gugma, Jackson. Ikaw ang nagtudlo nga mahigugma ako sa lain. Busa dili mo ako mabasol kun nganong ingon niini ang gidangatan sa atong gugma.”

Ingon sa hingpit nga naamang si Jackson sa akong atubangan. Unya huyhoy ang iyang mga abaga nga mibiya sa tubod. (Kataposan)