Joy Riding

Nakalimot na lang sila nga wala pa diay sila makakaon. Gikontak ni Lito ang counter ug gipahatud ang bugnaw na nila nga pagkaon. Nagdungan sila si Stella ug Lito sa pagpangaon.

“Nabatasan ba nimo nga makigkuyog adtong duha nimo ka kauban Stel nga hilig usab og joy riding?” Wala makapugong si Lito pagpangutana. Kaduha pa mi magkuyog nila, pero silingan ra mi’g balay. Gitug-anan ni Stella si Lito nga usahay sugoon siya pagbantay sa tindahan sa ilang silingan ug inigka-gabii hatagan siya og usa ka gatus. “Usahay baya makatabang ko ni Papa nga makapalit mi’g bugas,” ni Stella pa.

Misamot ang kalooy ni Lito sa dalaga. Nasuta ni Lito nga wala mamakak si Stella kaniya. Gikuot ni Lito ang iyang pitaka ug gihatagan niya’g tres mil pesos ang dalaga.

Makatabang na kana sa inyong kalisod Stel, unya ipa-check-up nato ang masakiton mo nga inahan sa doktor. Wala motingog si Stella apan wala siya makapugong sa pagpahiyom nga midawat sa dakung kantidad. Gihatud ni Lito si Stella didto dalan Panganiban. Gi-drop niya ang dalaga atubangan sa Barangay Hall sa Pahina Central. Sa dayong kanaug ni Stella sa awto, gipatikan ni Lito og hawok ang mga ngabil sa dalaga.

“Kadiyot lang Stel,” matud ni Lito. Giabli ni Lito ang gamay’ng tukador sa awto ug gikuha niya ang usa ka selpon. “Imo na kana nga selpon aron magkakontakay ta’ng duha.”

“Hala? Kanindot aning selpona, salamat g’yud kaayo ha?” wala makapugong si Stella pagpasalamat kang Lito tungod sa iyang kalipay. Pag-abot ni Stella sa balay, gitulog na ang amahan niya nga kargador.

“Day, nganong dugay ka man nga nauli. Gamay ra ang nahabiling pagkaon diha kay gamay ra ang kita ni Papa nimo,” matud sa masakiton niya nga inahan. “Walay problema Ma, mogawas usa ko kay magpalit ko og puso ug barbecue,” ni Stella pa. Wala madugay mibalik si Stella dala ang daghang pagkaon. “Diin ka man og kwarta day?” sa inahan pa nga nahibulong.

Wala motubag si Stella. Pagkabuntag. May silingan nila ni Stella nga nanawag. “Stel! Diay nangita nimo!” Pagdung-aw ni Stella sa bentana, si Lito ang diha sa gawas.

“Dad-on nato si Mama nimo sa doktor. Atimanon nato siya kay sa umaabot nga mga adlaw, ako na man usab siya nga inahan. Minyoan tika Stel,” ni Lito pa nga anak diay og adunahan. (Kataposan)