Klasmet sila si Karen ug Clara sa ilang pagtungha sa Unibersidad sa San Carlos ug kauban sila sa Math Subject. Sa tunghaan, halos dili sila magkabulag. Daghan sa ilang mga kaklase ang nag-ingon, nga mora kuno silag pinikas nga nangka. Dunay ilang mga klasmet ang nangutana kun asa kanilang duha ang tomboy nganong dili man gayod sila magkabulag.
“Babaye ako ug si Karen, babaye usab. Kun close kami, ingon lang gayod niana ang kapalaran,” tubag nila kun dunay mangutana. Apan, nungka nga dunay kalambigitan ang ilang panagsuod kun hisgotan matag nila ka gugma.
Ang matuod lang, duna silay tagsa-tagsa ka hinigugma ug mahal nila kini. Guwapo ang kang Karen ug ingon man usab ang kang Clara. Kausa gani kadto nga nagka uban sila sa usa ka picnic didto sa ilang tunghaan. Gani, usa ka higayon kadto nga silang duha didto sa baybayon, hinagkanay sila. Ug nanumpa sila nga inigkatapos sa ilang pagtuon sa kolehiyo, magminyo sila.
Ning bulan sa Nobiyembre petsa 17, 2011, nagkuyog sila si Karen ug Clara sa didto sa dakbayan sa Cagayan de Oro sanglit kay ning adlawa birthday sa inahan ni Clara ug si Karen mao ang very special guest ni Clara. Taga Cagayan de Oro si Clara ug matud pa niini, dili mahinayon ang pagsaulog sa birthday kun wala si Karen.
“Dawbi, wala man akoy kuwarta ipamasahi,” pulong ni Karen.
“Wala kay problema. Sagot kong lahat. The most important you can be with me. Karong Biyernes, molarga kita sakay sa barko ug inigka Domingo makapauli na kita sa Sugbo.”
“Sige! Wala pa ako makaadto sa Cagayan de Oro ug mao pa kini ang higayon nga makita ko ang mao nga siyudad,” pulong ni Karen.
Gabii sa Biyernes, andam na ang duha sa ilang pagbiyahe paingon sa Cagayan de Oro, ug samtang diha sila sa ilang higdaanan sa barko, nabati ni Clara ang gibalita sa Weather Bureau nga kuno ang Cagayan de Oro, naa sa storm signal no. 1 kun magpadayon ang dagan sa panahon. Wala kadto panumbalinga ni Clara. Gani, wala niya sultihi si Karen sa iyang nabati kay naa gayod sa iyang hunahuna nga kuyogan niya ang higala aron makaadto kini sa ilang dapit.
Pagka adlaw’ng Sabado, miabot sila sa pantalan sa Cagayan de Oro, misamot ang pagkusog ang ulan. Unya sa dul-an sa usa ka takna, didto na ang duha sa balay ni Clara ug malipayon silang gisugat sa inahan ni Clara. (Katapusan)