“Abi ko bag di ka gustong magsamok si Almina nako,” ni Angeline pa. “Nganong karon gusto man ko nimong gamitong instrumento aron makalikay ka sa imong obligasyon ngadto kaniya. Bentaha unta kun wala pa siya magsabak sa bunga sa inyong relasyon, puwede tingaling himuon ta ang maong gimik. Pero sa iyang kahimtang karon, di ko makahimo sa binuang nga gusto mong buhaton. Mas maayo nga pakaslan mo gyud siya.”
Wala’y nahimo si Erik sa pabor nga iyang gihangyo kang Angeline. Huyhoy ang mga abaga niini nga nanamilit ug mibiya sa gipuy-an sa dalaga. Daw nahisagmuyo kini pag-ayo sa pagbalibad ni Angeline.
“Mao nay gusto ni Erik nga inyong pagabuhaton?” Nakaingon si Vera human sultihi ni Angeline sa tuyo ni Erik kaniya.
“Oo,” tubag ni Angeline. “Pero nibalibad ko. Gawas nga di ko gustong masakitan si Almina, di sab ko makahimo paghatag og kinabuhi sa usa ka relasyon nga dili tinuod.”
Kaanugon baya, uy, nga gibalibaran mo si Erik.”
“Nganong anugon man?” -- Sumpayan pa