Man hater

“Sulod,” giagda sa ulitawo si Salie.

Wala mag-ukon-ukon pagsulod si Salie. May sopa gihapon sa maong balay. Sila si Salie ug Allan mipahiluna paglingkod. Nag-atubang sila. Apan kalit lang mitindog ang ulitawo nga nagpangalot sa iyang tingkoy. “Pastilan,” matud ni Allan.

“Naunsa ka?” sukot ni Salie nga nahibulong.

“Ang akong knapsack nahabilin,” ni Allan pa. “Tua sa sala sa dakong balay. Dinhi ka lang kay kuhaon una nako.” Ug dayon migawas si Allan.

Si Salie nga nahibilin nga naglingkod sa sopa mipasuroy sa iyang mga mata sa palibot -- nagmasusihon. Sa usa ka bahin sa hawanan nakita niya ang mubong lingkoranan nga giputos sa puting panapton. Sa masigka daplin nakita sa dalaga ang stand sa suga nga sama sa gagmay’ng mga spotlight.

Unya -- sa wala lang tuyoa -- napantok ang iyang panan-aw sa ilawom sa center table. Didto’y daghang mga magasin nga gihumpid. Nadani siya pagkuha’g usa ug kini iyang gipaklipakli. Dihay bahin sa mantalaan nga gilaksi. Ug dihay nahulog sa salog sa iyang pagpadayon ug pakli sa magasin. Duha ka cut out letter’s B ug E.

Takulahaw lang dihay misantop sa hunahuna ni Salie. Giabot siya’g katahap. Kalit midumbol sa iyang dughan ang kakulba nga naghunahuna sa iyang katahap.

Aron mamatud-an gayod niya ang iyang katahap, gisuling niya ang ubang mga mantalaan. Gigamhan siya sa curiousity. Diha gihapoy mga dahon sa mantalaan nga gipanglaksi. Ug dihay mga cut out letters nga gipalugpitan! -- Sumpayan pa

Intimate Moments