Man Hater

Gula 127

Naputol ang agos sa hunahuna ni Salie dihang may nabati siyang mga tunob sa kusina nga nagpaingon sa iyang nahimutangan. Gidali niya pag-uli ang mga baraha ngadto sa bag ug giserado ang siper. Diriyot gayod siya hiabti ni Allan.

“Dia ra ang atong pabugnaw,” ni Allan nga nagsapwang sa tray nga gipatongan sa duha ka baso sa mabugnaw’ng ilimnon ug sa mga tinapay nga gisulod sa plato. Gipahiluna kini sa pagbutang sa ulitawo ibabaw sa lingin nga lamesa.

“Nahasol ka lang hinuon nako, Al,” matud ni Salie.

“No, it’s alright,” ni Allan. “Okey, let’s eat.”

Misanong ang dalaga. Nangaon sila.

“Di ka ba lang motan-aw sa akong studio?” ni Allan dihang nahuman na ang ilang pangaon. “Ug sa akong darkroom?”

“Hain man kana mahimutang?” gipaliraw sa dalaga ang iyang mga mata.

“Sunod nako,” matud sa ulitawo dayong lakaw.

Misunod si Salie kang Allan nga mipaingon sa kusina. Nanggawas sila agi sa pultahan sa kusina nga maoy agianan paingon ngadto sa luyo. Nakita ni Salie nga may balay pa didto. Gamay kini sa unang balay nga ilang gisudlan. Didto sila mopaingon sa maong balay. Nangiob ang palibot sa maong balay nga ilang natukmaan.

Serado ang pultahan sa balay. Gikuha ni Allan ang usa ka skeleton key ug kini gipasok sa yawehanan. Giliso. Natukas ang palid sa pultahan. Misulod ang ulitawo ug gipasiga ang sugang dagitabnon. Mihayag ang sulod sa balay. -- Sumpayan pa