Ang tiguwang nga naeskandalo

Ingna kong bakakon kun di ni mahitabo akong gisulti. Napulo ka tuig gikan karon, bisa’g wa pa mo nakasal karon, magpa-anular mo sa inyong kasal!” Nihasol sa galamhan ni Maychel ang maong mga pulong. Lima na ka tuig silang kasal ni Aldwin. Duha na ilang anak. Ug dako na kaayo og kausaban ang lihok sa iyang kapikas. Kanunay na lang siyang mahibilin sa balay uban sa ilang mga anak.

Wa nay panahon si Aldwin sa iyang asawa’g mga anak. Puro na lang overtime ug good time sa gawas. Kun mouli, kaadlawon na. Ug kanunay’ng hubog. Kun pangutan-on og diin siya gikan, di motingog. Kun yawyawan, managpa. Nakatilaw siya og mahay nganong si Aldwin pa iyang gihigugma. Namalik sa iyang handurawan ang mga nindot nilang kaagi.

Paborito nilang estambayanan palabay sa oras kun dako sila’g vacant time sa eskuylahan, ang Footwear section sa Divine Grace Department Store. Maayo didto kay bugnaw ang aircon. Ug daghang lugar bakanteng kalingkuran. Anha man manglingkod ang mga kauban sa nangompra nga di gustong mokuyog sa grocery. Kasagarang mataymingan nila diha ang lalaki nga tiguwang. Seguro, drayber siya sa iyang asawa nga mag-grocery. Kay makit-an man usahay ni Maychel ang tiguwang babaye nga mokablit niya kun makigpamauli na.

Trayenta minutos ngadto’s usa ka oras nga maglingkod ang tiguwang sa estambayanan nga lingkuranan. Matag karon ug unya magpasiklap siya nilang Maychel ug Aldwin nga loving kaayo. Maggakos-gakos sila. Matag karon ug unya mokawat og hawok si Aldwin niya. Ug madala nalang sab si Maychel sa ilang gibati. Bisa’g daghang tawo mag-agi-agi sa ilang duol, di nila panumbalingon. Mag lips-to-lips ug dugay mag-ukang. Naeskandalo ang tiguwang nga basa ray bisyo sa iyang gilingkuran. Tagurha ka libro iyang dad-on. Ug pulipulihon niya’g basa. Duna tingale usahay puol nga basahon sa panid sa libro. Undangan niya’g basa.Ug basahon laing libro.

Wa na gyud sila nibalik ngadto sa department store sukad adtong usa ka hapon nga nakalalis nila ang tiguwang.

“Nganong di man lang mo mo-tsek-in? Anhi man mo magparayganay atubangan sa daghang tawo!” sa tiguwang nga naglingi nila. Diha sa ilang wala naglingkod ang tiguwang. Sa wala sab sa tiguwang, may duha nga nanglingkod. Babaye’g lalaki sab. Apan pormal ilang lihok. Wa sila magkarinyohay.

Nanglipaghong silas Maychel ug Aldwin. Wa katingog sa gisulti sa tiguwang.

“Tataw nga manag-uyab pa mo.Kay lihok pa man kaayo mo kun magkatupad. Tan-awa ring mga minyo na sa akong wala. Di ba pormal kaayo. Kay adto lang sila magkarinyohay sa ila. Dili pareha ninyo nga way lugar sa inyong balay.Kay tingale ang amahan sa babaye, di gustong bisitahan og lalaki iyang anak. Maong anhi lang mo magkarinyohay sa estambayanan sa dapartment store” sa tiguwang. Nibudlat ang mata nga daw nahoot sa iyang antiyohos.

“Way makabuot namo Noy, kun unsay among buhaton. Kay dagko na mi. Mismo among ginikanan, dili ka buot namo!” tubag ni Aldwin nga pinabundak. Wa lang si Maychel nagtingog. Kay nauwaw siya’s tiguwang.

“Lihok kaayo mo’g tsansinganay kay wa pa ninyo masukod unsa ka taas inyong pasensiya ug unsa kalawom inyong gugma sa usa’g-usa. Tan-awa unya’g magkasinukdanay namo. Di ba moguwa ang natural ninyong kinaiya nga wa mauyoni sa usa’g-usa. Ikaw babaye mahimo kang nagger. Ikaw lalaki, mahimo kang palahubog ug hingulata,” sa tiguwang. Nisugod nag panglingi ang mga salesgirls ug salesboy sa department store nila. Hasta sab ang ubang mga customers. Naintriga sa tiguwang. Nagsugod nag tapok ang mga tawo sa ilang duol. Gisikdo ni Maychel si Aldwin nga manglakaw na sila. Wa na gyud sila nibalik didtong dapita. Ug wa gyud si Maychel nalimot sa katapusang pulong sa tiguwang.

Kaklase silang Aldwin sa kursong Accountancy. Nikuha dayon sila’g board exams paggradwar nila. Nahagbong si Maychel. Nakapasar si Aldwin. Nahimong CPA. Unya nagpakasal sila kay nabuntis si Maychel.

Karon, lawom nang gabii. Naglingkod si Maychel sa terasa sa ilang balay sa Silver Hills Village. Nagpanglantaw sa unahan kun may sakyanan bang nagsingabot. “Nakatag-an ang tiguwang” tuaw niya sa hilom. Nakahukom siya nga mokunsulta nag abogado. (Katapusan)